മൂലമറ്റം: വാഗമണ്ണിലെ കാട്ടിനുള്ളില്‍ കുടുങ്ങിയ യുവാക്കളെ രക്ഷപ്പെടുത്തി അഗ്‌നിരക്ഷാസേന. ഇരുവരും മൂവാറ്റുപുഴ സ്വദേശികളാണ് . പുള്ളിക്കാനത്തിന് അടുത്തുള്ള എസ് വളവിന് സമീപം വെള്ളിയാഴ്ച രാത്രി ഏഴരയോടെയാണ് സംഭവം.

 ഈസ്റ്റ് മാറാടി തകിടിപ്പുറത്ത് സ്വദേശി ശ്യാം ടി. കുഞ്ഞുമോന്‍ (31), എന്‍ജിഒ ക്വാര്‍ട്ടേഴ്‌സ് മൈലാടി സ്വദേശി നിഖില്‍ ബിനു (23) എന്നിവരാണ് കാഴ്ചകള്‍ കാണുന്നതിനിടെ ഉള്‍ക്കാട്ടില്‍ അകപ്പെട്ടത്.

വൈകീട്ട് അഞ്ചരയോടെ ഇരുചക്രവാഹനത്തില്‍ എത്തിയ ഇരുവരും വാഹനം പാര്‍ക്ക് ചെയ്ത ശേഷം സമീപത്തെ ചെറുറോഡിലൂടെ നടന്ന് പ്രകൃതിഭംഗി ആസ്വദിക്കുകയായിരുന്നു. അര കിലോമീറ്ററോളം നടന്ന ശേഷം വലിയ പാറക്കെട്ടിന് മുകളിലെത്തിയപ്പോള്‍ കനത്ത കോടമഞ്ഞും ഇരുട്ടും പെട്ടെന്ന് വ്യാപിച്ചു. ദിശ തിരിച്ചറിയാനാകാതെ വഴിതെറ്റിയ ഇരുവരും സമീപത്ത് അഗാധമായ കൊക്കയുണ്ടെന്ന് മനസ്സിലാക്കിയതോടെ ഭയത്തിലായി.

ALSO READ: ആവേശം കൊള്ളാം, പക്ഷെ കളി ലൈനിനോട് വേണ്ട; ഫുട്‌ബോള്‍ ആരാധകര്‍ക്ക് കര്‍ശന മുന്നറിയിപ്പുമായി കെഎസ്ഇബി 

ഇതിനിടെ ഒരാളുടെ മൊബൈല്‍ ഫോണ്‍ ചാര്‍ജ് തീര്‍ന്ന് ഓഫായി. തുടര്‍ന്ന് മറ്റൊരു ഫോണിലൂടെ യുവാക്കള്‍ മൂലമറ്റം അഗ്‌നിരക്ഷാസേനയെ വിവരം അറിയിച്ചു. സ്ഥലത്തെത്തിയ സേനാംഗങ്ങള്‍ക്ക് റേഞ്ച് പ്രശ്‌നത്തെ തുടര്‍ന്ന് ഫോണ്‍ വഴി ബന്ധപ്പെടാന്‍ ബുദ്ധിമുട്ടുണ്ടായെങ്കിലും, പിന്നീട് ലഭിച്ച നെറ്റ്‌വര്‍ക്ക് സൗകര്യം ഉപയോഗിച്ച് യുവാക്കള്‍ ഗൂഗിള്‍ ലൊക്കേഷന്‍ അയച്ചുനല്‍കി.

ടോര്‍ച്ചുകളുടെ വെളിച്ചവും ശബ്ദസൂചനകളും ഉപയോഗിച്ച് അഗ്‌നിരക്ഷാസേനാംഗങ്ങള്‍ മുക്കാല്‍ മണിക്കൂറിലേറെ തിരച്ചില്‍ നടത്തി. ഒടുവില്‍ ഭയന്നും ക്ഷീണിതരുമായ നിലയില്‍ യുവാക്കളെ കണ്ടെത്തി സുരക്ഷിതമായി പുറത്തേക്ക് എത്തിച്ചു.

തുടര്‍ന്ന് ഇരുവരെയും മൂലമറ്റം ഫയര്‍ സ്റ്റേഷനിലെത്തിക്കുകയും ബന്ധുവിനെ വിവരം അറിയിച്ച് അദ്ദേഹത്തോടൊപ്പം വീട്ടിലേക്ക് അയക്കുകയും ചെയ്തു.

അഗ്‌നിരക്ഷാസേനാംഗങ്ങളായ കെ. സന്ദീപ്, ജിബി പി. വരമ്പനാട്ട്, ജെയിംസ് തോമസ്, ഷിന്റോ ജോസ് എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി.

people trapped in Vagamon forest due to heavy fog