ബ്രസല്‍സ്: യൂറോ കപ്പിലെ മോശം പ്രകടനത്തെ തുടര്‍ന്ന് കോച്ച് മാര്‍ക് വില്‍മോട്‌സിനെ ബെല്‍ജിയം പുറത്താക്കി. പ്രതിഭാധനരായ സൂപ്പര്‍ താരങ്ങള്‍ ടീമിലുണ്ടായിട്ടും ടീമിനെ മുന്നോട്ടു നയിക്കുന്നതില്‍ വില്‍മോട്‌സ് പരാജയപ്പെട്ടെന്ന് ബെല്‍ജിയം ഫുട്‌ബോള്‍ അസോസിയേഷന്‍ പ്രസിഡന്റ് ഫ്രാന്‍കോയിസ് ഡെ കീര്‍സ്‌മെക്കര്‍ പറഞ്ഞു. യൂറോയില്‍ കിരീടം നേടാനാവുമെന്ന് ഏറെ പ്രതീക്ഷയുണ്ടായിരുന്നു. എന്നാല്‍ ടീമിന്റെ തന്ത്രങ്ങളെല്ലാം പാളി. ടീമിനെ പുതിയ രീതികളിലേക്ക് വളര്‍ത്തേണ്ടതുണ്ട്. അതിനാണു കോച്ചിനെ മാറ്റുന്നതെന്ന് കീര്‍സ്‌മെക്കര്‍ കൂട്ടിച്ചേര്‍ത്തു. അതേസമയം ലോകകപ്പ് യോഗ്യതാ മത്സരത്തിനു മുന്‍പ് ടീമിന് പുതിയ കോച്ച് വന്നേക്കും. വില്‍മോട്‌സിന്റെ കീഴിലാണ് ബെല്‍ജിയം ഫിഫ റാങ്കിങില്‍ ഒന്നാമതെത്തിയത്. കഴിഞ്ഞ ലോകകപ്പിന്റെ ക്വാര്‍ട്ടറിലെത്തിയതാണ് പ്രധാന നേട്ടം.
ഏദന്‍ ഹസാര്‍ദ്, വിന്‍സെന്റ് കോംപനി, കെവിന്‍ ഡി ബ്രുയ്ന്‍ തുടങ്ങിയ  താരങ്ങളെ വളര്‍ത്തിയെടുത്തതും വില്‍മോട്‌സാണ്.