കൊച്ചി: അഞ്ചാം സീസണില്‍ കേരള ബ്ലാസ്റ്റേഴ്‌സിന് വേണ്ടി മികച്ച പ്രകടനം നടത്തിയ സഹല്‍ അബ്ദുല്‍ സമദിനെ തേടി വീണ്ടും അംഗീകാരം. ഐ.എസ്.എല്ലിലെ ഏറ്റവും മികച്ച മിഡ്ഫീല്‍ഡറെന്ന നേട്ടമാണ് സഹലിനെ തേടി എത്തിയിട്ടുള്ളത്. ആരാധകരുടെ വോട്ടെടുപ്പിലൂടെ ആയിരുന്നു മികച്ച മിഡ്ഫീല്‍ഡറെ തിരഞ്ഞെടുത്തത്. വോട്ടിങിന്റെ ഫലം ഇന്നലെയാണ് പ്രഖ്യാപിച്ചത്. എതിരാളികളെ ബഹുദൂരം പിന്നിലാക്കിയാണ് സഹല്‍ മികച്ച മിഡ്ഫീല്‍ഡറായി മാറിയത്. കഴിഞ്ഞ ദിവസം കേരള ബ്ലാസ്റ്റേഴ്‌സുമായി പുതിയ കരാര്‍ ഒപ്പുവച്ച സഹലിനും ബ്ലാസ്റ്റേഴ്‌സ് ആരാധകര്‍ക്കും ഇത് ഇരട്ടിമധുരമായി. ബ്ലാസ്റ്റേഴ്‌സിന് മോശം സീസണായിരുന്നെങ്കിലും സഹല്‍ മികച്ച പ്രകടനമായിരുന്നു പുറത്തെടുത്തത്. ബ്ലാസ്റ്റേഴ്‌സിലെ പ്രകടനം കാരണം സഹലിന് അണ്ടര്‍ 23 ടീമിലും ഇടം ലഭിച്ചു.