കുമളി:  വാഹനം ഇല്ലാത്തതിനാല്‍ ബോട്ടിങിന് ടിക്കറ്റെടുത്ത നിരവധി പേര്‍ക്ക് കുമളിയിയില്‍ നിന്നും തേക്കടിക്ക് പോകാനായില്ല.  
ബോട്ട് ടിക്കറ്റെടുത്ത് എടുത്ത നൂറുകണക്കിന് ആളുകളാണ് വാഹനം കാത്ത് മണിക്കൂറുകളോളം പൊരി വെയിലില്‍ ആനവച്ചാലില്‍ നില്‍ക്കേണ്ടി വന്നത്. ഇതിനെ തുടര്‍ന്ന് നിരവധി പേര്‍ മടങ്ങിപ്പോയി. മാര്‍ച്ച് ഒന്ന് മുതലാണ് തേക്കടിയിലേക്കുള്ള സ്വകാര്യ വാഹനങ്ങള്‍ വനംവകുപ്പ് നിരോധിച്ചത്.
ഇതിനെ തുടര്‍ന്ന് ഇരവികുളത്ത് നിന്നും അഞ്ച് മിനി ബസ് എത്തിയെങ്കിലും മാര്‍ച്ച് 31ന് തിരിച്ചുപോയി. വാടകയ്‌ക്കെടുത്ത അഞ്ച് ടെമ്പോ ട്രാവലറാണ് ഇപ്പോള്‍ സര്‍വീസ് നടത്തുന്നത്.
ഇതില്‍ ഒരു ട്രിപ്പില്‍ 75 പേര്‍ക്ക് യാത്ര ചെയ്യാനുള്ള സീറ്റാണുള്ളത്.
ആനവച്ചാലില്‍ ബോട്ട് ടിക്കറ്റെടുത്ത ശേഷം വാഹനം കാത്ത് വെയിലില്‍ ക്യൂനിന്ന നിരവധി പേര്‍ തിരികെ പോയി. ടിക്കറ്റെടുത്ത് തേക്കടിയിലെത്തിയ ചിലര്‍ക്ക് വൈകിയതിനാല്‍ ബോട്ട് സവാരി നടത്താനായില്ല. വനംവകുപ്പിന്റെ നടപടി മൂലം സഞ്ചാരികള്‍ക്കിടയില്‍ വലിയ പ്രതിഷേധമാണ് ഉയരുന്നത്.