ശ്രീനഗര്‍: ജമ്മു കശ്മിരിലെ രാജൗരിയിലുണ്ടായ പാക് വെടിവയ്പില്‍ ഒരു ഇന്ത്യന്‍ സൈനികന് വീരമൃത്യു. രാജൗരിയിലെ നൗഷേര സെക്ടറില്‍ കഴിഞ്ഞ ദിവസം രാത്രിയായിരുന്നു ആക്രമണം. ഇവിടെ അര്‍ധരാത്രി ഒന്നോടെയാണ് ആക്രമണമുണ്ടായതെന്നും വെടിവയ്പും ഷെല്ലാക്രമണവും നടന്നെന്നും സൈന്യം വ്യക്തമാക്കി.

ഇതില്‍ ഗുരുതരമായി പരുക്കേറ്റ സൈനികനെ ആശുപത്രിയിലെത്തിച്ചെങ്കിലും മരിക്കുകയായിരുന്നു. ഹവില്‍ദാര്‍ സാംബൂര്‍ ഗുരുങ് ആണ് കൊല്ലപ്പെട്ടത്.

അതേസമയം, കശ്മിരിലെ ബാരാമുള്ളയില്‍ നടന്ന ഏറ്റുമുട്ടലില്‍ രണ്ടു ഭീകരരെ വധിച്ചതായും സൈന്യം വ്യക്തമാക്കി. കഴിഞ്ഞ  ദിവസം അര്‍ധരാത്രി പാകിസ്താനില്‍നിന്ന് നുഴഞ്ഞുകയറാന്‍ ശ്രമിച്ച രണ്ടു ലഷ്‌കറെ ത്വയ്ബ ഭീകരരെയാണ് നിയന്ത്രണരേഖയ്ക്കു സമീപത്തുവച്ച് വെടിവച്ചു കൊന്നതെന്നാണ് സൈന്യം വ്യക്തമാക്കിയത്. ഇതില്‍ ഒരാള്‍ 2018ല്‍ വാഗ വഴി പാകിസ്താനിലേക്ക് പോയ കുപ്‌വാര സ്വദേശി ഇദ്‌രീസ് അഹമ്മദ് ഭട്ടാണ്. മറ്റേയാണ് വിദേശിയാണെന്നു സംശയിക്കുന്നതായും സൈന്യം വ്യക്തമാക്കി. ഇവരില്‍നിന്നു ചൈനയില്‍ നിര്‍മിച്ചതടക്കമുള്ള തോക്കുകള്‍ കണ്ടെത്തിയതായും വിവരമുണ്ട്.