തിരുവനന്തപുരം: തെരഞ്ഞെടുപ്പില്‍ മാധ്യമങ്ങളെ വിലയ്‌ക്കെടുക്കുന്നതിന്റെ ഭാഗമാണ് സര്‍വേകളെന്ന് മുഖ്യമന്ത്രി പിണറായി വിജയന്‍. നാടിന്റെ യാഥാര്‍ത്ഥ്യവുമായി ഒരു ബന്ധവുമില്ലാത്തതാണ് മാധ്യമങ്ങളുടെ സര്‍വേകളെന്നും ഇന്നലെ തിരുവനന്തപുരം ജില്ലയുടെ വിവിധ ഭാഗങ്ങളില്‍ നടന്ന ഇടതുമുന്നണി തെരഞ്ഞെടുപ്പു പൊതുയോഗങ്ങള്‍ ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു.

താഴെ വീണുകിടക്കുന്ന കക്ഷികളെ ഉത്തേജിപ്പിക്കാനാണ് ഇവ പടച്ചുവിടുന്നത്. എന്നാല്‍ ഈ തട്ടിക്കൂട്ടു സര്‍വേകള്‍ കൊണ്ടൊന്നും വീണുകിടക്കുന്നവര്‍ ഉയര്‍ന്നുവരില്ല. തെരഞ്ഞെടുപ്പില്‍ മാധ്യമങ്ങളെ വിലയ്‌ക്കെടുക്കുന്നത് മുന്‍പും നടന്നിട്ടുണ്ട്. അത് ഇപ്പോഴും തുടരുകയാണ്. ബി.ജെ.പിയും കോണ്‍ഗ്രസുമാണ് മാധ്യമങ്ങളെ പണം കൊടുത്തു വശത്താക്കുന്നത്. നാടിന്റെ യാഥാര്‍ത്ഥ്യം മറച്ചുവച്ച് മറ്റൊരു ചിത്രം കാണിക്കാനാണ് പണം നല്‍കുന്നത്.

പണം വാങ്ങിയവര്‍ പറയുന്നതിനുസരിച്ചുള്ള വാര്‍ത്തകള്‍ മാധ്യമങ്ങള്‍ നല്‍കും. സര്‍വേകളും ഇതിന്റെ ഭാഗമാണ്. പക്ഷെ ഇതു കൊണ്ടൊന്നും ഒരു പ്രയോജനവുമില്ല. കേരളത്തില്‍ ഇടതു മുന്നണി 2004നേക്കാള്‍ കൂടുതല്‍ സീറ്റ് നേടും. അന്ന് 18 സീറ്റുകളാണ് നേടിയത്. എന്നാല്‍ ഇക്കുറി ഇരുപതും നേടും. ഇടതുമുന്നണിയ്ക്ക് അനുകൂലമായി ജനങ്ങള്‍ക്കിടയില്‍ അത്രയ്ക്ക് ഉണര്‍വുണ്ട്. ഇതു നാടിന്റെ മുക്കിലും മൂലയിലും ദൃശ്യമാണ്.

ഇന്നുവരെ നടന്ന തെരഞ്ഞെടുപ്പുകളില്‍ നിന്നും തികച്ചും വ്യത്യസ്തമാണ് ഇത്തവണത്തേത്. മതനിരപേക്ഷത തകര്‍ത്ത, ജനാധിപത്യ മൂല്യങ്ങളെ മാനിക്കാത്ത, ജനജീവിതം ദുസ്സഹമാക്കിയ ബി.ജെ.പി വീണ്ടും അധികാരത്തില്‍ വന്നാല്‍ രാജ്യം സര്‍വനാശത്തിലേക്കു കൂപ്പുകൂത്തും. നരേന്ദ്രമോദി വീണ്ടും പ്രധാനമന്ത്രിയായാല്‍ രാജ്യത്ത് വീണ്ടുമൊരു തെരഞ്ഞെടുപ്പ് ഉണ്ടാകില്ലെന്ന് ബി.ജെ.പി എം.പി സാക്ഷി മഹാരാജ് പ്രഖ്യാപിച്ചിട്ടുണ്ട്. പക്ഷെ ജനാധിപത്യം അത്ര ദുര്‍ബലമല്ല. അതിനെ എളുപ്പം തകര്‍ക്കാനാവില്ല. ജനാധിപത്യത്തിന്റെ കരുത്തും ജനാധിപത്യ വിശ്വാസികളുടെ ശക്തിയും ഇവര്‍ക്കു മുന്‍പ് ബോധ്യമായിട്ടുള്ളതാണ്. ഈ ശക്തിയും കരുത്തും ആര്‍.എസ്.എസിന് ഈ തെരഞ്ഞെടുപ്പിലൂടെ വീണ്ടും മനസിലാകുമെന്നും മുഖ്യമന്ത്രി പറഞ്ഞു.