കുളത്തൂപ്പുഴ (കൊല്ലം): പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി പീഡിപ്പിക്കാന്‍ ശ്രമിച്ച ഓട്ടോറിക്ഷാ ഡ്രൈവര്‍ പിടിയില്‍.
കുളത്തൂപ്പുഴ കല്ലുവെട്ടാംകുഴി ഒ.എല്‍.എച്ച് നമ്പര്‍ 10ല്‍ ശിവകുമാറാ(35)ണ് കുളത്തൂപ്പുഴ സര്‍ക്കിള്‍ ഇന്‍സ്‌പെക്ടര്‍ ഗിരീഷ്‌കുമാറിന്റെ നേതൃത്വത്തിലുള്ള പൊലിസ് സംഘത്തിന്റെ പിടിയിലായത്.
കുളത്തൂപ്പുഴ സ്വദേശിനിയായ പെണ്‍കുട്ടിയെ ഇയാള്‍ കഴിഞ്ഞ ദിവസം പകല്‍ ഓട്ടോറിക്ഷയില്‍ കയറ്റി മുപ്പതടി പാലത്തിനു സമീപമുള്ള കുറ്റിക്കാട്ടിലേക്ക് കൊണ്ടുപോകുകയും ബഹളം വച്ച പെണ്‍കുട്ടിയെ ഭീഷണിപ്പെടുത്തി പീഡിപ്പിക്കാന്‍ ശ്രമിക്കുകയുമായിരുന്നു.
പെണ്‍കുട്ടിയുടെ മാതാവില്‍ നിന്നും കടം വാങ്ങിയ പണം തിരികെ നല്‍കാമെന്നു പറഞ്ഞു പ്രലോഭിപ്പിച്ചാണ് പെണ്‍കുട്ടിയെ ഓട്ടോറിക്ഷയില്‍ കയറ്റി കൊണ്ടു പോയത്.
എറെ നേരത്തിനുശേഷം പെണ്‍കുട്ടിയെ കാണാത്തതിനെ തുടര്‍ന്ന് മാതാവ് തിരക്കിയെത്തിയപ്പോഴാണ് സംഭവം പുറത്തറിയുന്നത്. ആദിവാസികളാണ് കുട്ടിയെ വനത്തിനുള്ളില്‍ കണ്ടെത്തിയത്.
അവിടെ നിന്ന് കടന്ന പ്രതിയെ ഇന്നലെ പൊലിസ് പിടികൂടി. പ്രതിയുമായി പൊലിസ് സ്ഥലത്ത് തെളിവെടുപ്പ് നടത്തി. പ്രതിക്കെതിരേ പോക്‌സോ കുറ്റം ചുമത്തിയാണ് കേസെടുത്തത്. മുന്‍പ് ഏഴു വയസുകാരിയെ സമാന രീതിയില്‍ ഇതേ കാട്ടില്‍ വച്ച് ബലാത്സംഗം ചെയ്ത് കൊലപ്പെടുത്തിയിരുന്നു.