പാപ്പിനിശ്ശേരി: കല്യാശേരിയില്‍ ടാങ്കര്‍ ലോറി മറിഞ്ഞുണ്ടായ അപകടത്തില്‍ ഡ്രൈവര്‍ക്ക് പരുക്കേറ്റു. ഇന്നലെ പുലര്‍ച്ചെ അഞ്ചോടെയാണ് മംഗളൂരുവില്‍നിന്ന് പാചകവാതകം നിറയ്ക്കാന്‍ പോകുന്ന കോഴിക്കോട് ഭാരത് ഗ്യാസിന്റെ ലോറി നിയന്ത്രണം വിട്ട് പാതയ്ക്കരികിലെ പറമ്പിലേക്ക് മറിഞ്ഞത്.
സമീപത്ത് വൈദുതി തൂണുകള്‍ ഉണ്ടായിരുന്നെങ്കിലും അതില്‍ ഇടിക്കാതെ ലോറി താഴേക്ക് മറിയുകയായിരുന്നു. ഈ സ്ഥലത്തിന് 300 മീറ്റര്‍ അകലെ മൂന്നുവര്‍ഷം മുന്‍പ് പാചകവാതക ടാങ്കര്‍ മറിഞ്ഞിരുന്നു. അന്ന് പി.സി.ആര്‍ ബാങ്കിന് മുന്നില്‍ മറിഞ്ഞ പാചകവാതക ലോറിയിലെ വാതകം 18 മണിക്കൂറോളം കത്തിയിരുന്നു. ഇത് കൂടാതെ പിന്നീട് മൂന്ന് ടാങ്കറുകള്‍ മാങ്ങാടിനും കീച്ചേരിക്കും ഇടയില്‍ അപകടത്തില്‍പെട്ടിട്ടുണ്ട്.
റോഡിന്റെ അശാസ്ത്രീയ നിര്‍മാണമാണ് പ്രദേശത്ത് അടിക്കടിയുണ്ടാകുന്ന വാഹനാപകടങ്ങള്‍ക്ക് കാരണമാകുന്നതെന്ന് നാട്ടുകാര്‍ ആരോപിച്ചു. കണ്ണപുരം എസ്.ഐ മഹേഷ് ആര്‍. നായരും സംഘവും എത്തി ടാങ്കര്‍ പരിശോധിച്ചു. ഖലാസികള്‍ എത്തി ടാങ്കര്‍ ഉയര്‍ത്താനുള്ള ശ്രമം രാത്രി വൈകിയും തുടരുകയാണ്.