ജയ്പൂര്‍: രാജസ്ഥാനില്‍ സര്‍ക്കാരിനെ അട്ടിമറിക്കാന്‍ പദ്ധതിയിട്ടെന്ന ആരോപണത്തിലുള്‍പ്പെട്ട കേന്ദ്രമന്ത്രി ഗജേന്ദ്രസിങ് ഷെഖാവത് രാജിവയ്ക്കണമെന്ന് കോണ്‍ഗ്രസ്. കോണ്‍ഗ്രസ് പുറത്തുവിട്ട ഫോണ്‍ സംഭാഷണത്തിലെ ശബ്ദം  തന്റേതല്ലെന്നാണ് നേരത്തെ ഗജേന്ദ്രസിങ് വ്യക്തമാക്കിയിരുന്നത്. എങ്കില്‍, അന്വേഷണ സംഘത്തിന് ശബ്ദസാമ്പിള്‍ നല്‍കുന്നതിന് അദ്ദേഹം തയാറാകാത്തത് എന്തെന്നായിരുന്നു കോണ്‍ഗ്രസിന്റെ മറുചോദ്യം.

സര്‍ക്കാരിനെ അട്ടിമറിക്കാനുള്ള ഗൂഢാലോചനയില്‍ പങ്കാളിയായ കേന്ദ്രമന്ത്രി രാജിവയ്ക്കണമെന്നും ശബ്ദസാമ്പിള്‍ അന്വേഷണ സംഘത്തിനു കൈമാറണമെന്നും കോണ്‍ഗ്രസ് നേതാവ് അജയ് മാക്കന്‍ ആവശ്യപ്പെട്ടു. അതേസമയം, രാജസ്ഥാന്‍ സര്‍ക്കാര്‍ രാഷ്ട്രീയ നേതാക്കളുടെ ഫോണ്‍ ചോര്‍ത്തിയെന്ന ആരോപണത്തില്‍ സംസ്ഥാന ചീഫ് സെക്രട്ടറിയോട് കേന്ദ്ര ആഭ്യന്തര മന്ത്രാലയം വിശദീകരണം തേടിയിട്ടുണ്ട്. നേരത്തെ, ഈ വിഷയം സി.ബി.ഐ അന്വേിക്കണമെന്ന് ബി.ജെ.പി ആവശ്യപ്പെട്ടിരുന്നു.