പ്രശ്‌നബാധിത സാധ്യതയുള്ള 3,607 ബൂത്തുകളില്‍ വെബ്കാസ്റ്റിങ് സംവിധാനവും ഒരുക്കും. തീവ്ര പ്രശ്‌നബാധിത, പ്രശ്‌നസാധ്യതാ ബൂത്തുകളില്‍ മൈക്രോ ഒബ്‌സര്‍വര്‍മാരെയും നിയോഗിക്കും

തിരുവനന്തപുരം: തെരഞ്ഞെടുപ്പ് സുരക്ഷയ്ക്കായി 57 കമ്പനി അര്‍ധ സൈനിക വിഭാഗത്തെ വിന്യസിക്കാന്‍ ഇന്നലെ മുഖ്യ തെരഞ്ഞെടുപ്പ് ഓഫിസറും പൊലിസ് അധികാരികളും തമ്മിലുള്ള ചര്‍ച്ചയില്‍ തീരുമാനമായി.

തീവ്ര പ്രശ്‌നബാധിത ബൂത്തുകളിലും തീവ്ര സ്വഭാവമുള്ള സംഘടനകളുടെ സ്വാധീനമുള്ള മേഖലകളിലും കൂടുതല്‍ അര്‍ധ സൈനിക വിഭാഗം ഉദ്യോഗസ്ഥരെയും കേരള പൊലിസ് സേനാംഗങ്ങളെയും നിയോഗിക്കും. സംസ്ഥാന പൊലിസിനു പുറമേ, തമിഴ്‌നാട്, ആന്ധ്രാപ്രദേശ് എന്നിവിടങ്ങളില്‍നിന്ന് 2,000 പൊലിസ് ഉദ്യോഗസ്ഥരെ അധികമായി എത്തിക്കും. പ്രശ്‌നബാധിത സാധ്യതയുള്ള 3,607 ബൂത്തുകളില്‍ വെബ്കാസ്റ്റിങ് സംവിധാനവും ഒരുക്കും. മുന്‍കാല ചരിത്രം കണക്കിലെടുത്ത് കണ്ണൂര്‍ ജില്ലയിലെ ബൂത്തുകളില്‍ പ്രത്യേക ശ്രദ്ധ നല്‍കും. ജില്ലയില്‍ ആകെയുള്ള 1,857 ബൂത്തുകളില്‍ 250 എണ്ണം തീവ്ര പ്രശ്‌നബാധിത ബൂത്തുകളാണ്. 611 പ്രശ്‌നസാധ്യതാ ബൂത്തുകളും 24 കുറവ് പ്രശ്‌നസാധ്യതയുള്ള ബൂത്തുകളുമുണ്ട്. 39 ബൂത്തുകള്‍ തീവ്ര സ്വഭാവമുള്ള സംഘടനകളുടെ സ്വാധീനമുള്ള മേഖലയിലുമാണ്.

ഇവിടങ്ങളില്‍ ശക്തമായ സുരക്ഷയൊരുക്കാന്‍ നടപടികള്‍ എടുത്തിട്ടുണ്ട്. പൊതു നിരീക്ഷകന്‍, പൊലിസ് നിരീക്ഷകന്‍, ചെലവ് നിരീക്ഷകന്‍ എന്നിവരുടെ നിരീക്ഷണം ഇവിടെ ശക്തമായുണ്ട്. കണ്ണൂര്‍ ജില്ലയിലെ ഭൂരിഭാഗം ബൂത്തുകളിലും വെബ്കാസ്റ്റിങ് സംവിധാനം ഒരുക്കുമെന്നും മുഖ്യ തെരഞ്ഞെടുപ്പ് ഓഫിസര്‍ ടീക്കാറാം മീണ അറിയിച്ചു.
കൂടാതെ തീവ്ര പ്രശ്‌നബാധിത, പ്രശ്‌നസാധ്യതാ ബൂത്തുകളില്‍ മൈക്രോ ഒബ്‌സര്‍വര്‍മാരെയും നിയോഗിക്കും. ഇവരെ പൊതു നിരീക്ഷകരുടെ നേതൃത്വത്തിലും നിയന്ത്രണത്തിലുമായിരിക്കും വിന്യസിക്കുക.