നെടുമങ്ങാട്: നെടുമങ്ങാട് താലൂക്കില്‍ കുടിവെള്ള ക്ഷാമം രൂക്ഷമാകുന്നു. കഴിഞ്ഞ കുറച്ചു ദിവസങ്ങളിലായി പഞ്ചായത്തുകളിലും നഗരസഭയിലും പല ഭാഗത്തും കുടിവെള്ളമില്ലാതെ ജനങ്ങള്‍ വലയുകയാണ്. വിതുര, നന്ദിയോട്, പെരിങ്ങമ്മല, ആനാട്, കരകുളം പഞ്ചായത്തുകളിലും നെടുമങ്ങാട് നഗരസഭയിലും ഭൂരിഭാഗം മേഖലയിലും കുടിവെള്ളത്തിന് ക്ഷാമമാണ്.  കിള്ളിയാര്‍, വാമനപുരം നദിയും, കരമാനയാറും നീരൊഴുക്ക് നിലച്ച അവസ്ഥയിലാണ്. കിള്ളിയാറും, വാമനപുരം നദിയും ഭൂരിഭാഗം പ്രദേശവും നീരൊഴുക്ക് ഇല്ലാതെ വറ്റി വരണ്ടു കിടക്കുകയാണ്. നീരുറവകളും ചെറു തോടുകളും കുളങ്ങളും വെള്ളമില്ലാതെ വറ്റി. താലൂക്കിലെ ഉയരം കൂടിയ പ്രദേശങ്ങളില്‍ ചൂട് കനത്ത സമയങ്ങളില്‍ തന്നെ കുടിവെള്ളം നിലച്ചിരുന്നു. നിലവില്‍ പലയിടങ്ങളിലും ചുമട്ടു വെള്ളമാണ് ആശ്രയം. കുടിവെള്ള ക്ഷാമം രൂക്ഷമായിട്ടും ടാങ്കറുകളില്‍ വെള്ളമെത്തിക്കാന്‍ പഞ്ചായത്തറ അധികൃതര്‍ തയാറാകാത്തത് പ്രതിഷേധങ്ങള്‍ക്ക് ഇടയാക്കുന്നുണ്ട്. നെടുമങ്ങാട് താലൂക്കിലെ രൂക്ഷമായ കുടിവെള്ള ക്ഷാമത്തിന് അടിയന്തരമായി പരിഹാരം കാണണമെന്ന് ജില്ലാപഞ്ചായത്ത് പ്രതിപക്ഷനേതാവ് ആ നാട് ജയന്‍ ആവിശപ്പെട്ടു. നെടുമങ്ങാട് താലൂക്കിലെ മലയോര മേഖലയും അതോടൊപ്പം തന്നെ മറ്റു പ്രദേശങ്ങളുംരൂക്ഷമായ കുടിവെള്ളക്ഷാമം അനുഭവിക്കുകയാണെന്നും ഇതിന് അടിയന്തിര പരിഹാരം കാണാന്‍ ടാങ്കറില്‍ വെള്ളം വിതരണം ചെയ്യാന്‍ തദ്ദേശസ്വയംഭരണ സ്ഥാപനങ്ങള്‍ക്ക് അനുമതി നല്‍കണമെന്നും ആനാട് ജയന്‍ പറഞ്ഞു. കേരളം ഇന്നുവരെ കണ്ടിട്ടില്ലാത്ത കൊടുംവേനലില്‍ കേരളം വെന്തുരുകുമ്പോള്‍ ഇലക്ഷന്റെ പേര് പറഞ്ഞ് ഫണ്ട് അനുവദിക്കാത്തത് ക്രൂരതയാണന്നും ഗവണ്‍മെന്റ് ഈ വിഷയത്തില്‍ അടിയന്തിരമായി ഇടപെടണമെന്നും ആനാട് ജയന്‍ ആവിശ്യപ്പെട്ടു.