ഗൂഡല്ലൂര്‍: കാട്ടാനയുടെ ആക്രമണത്തില്‍ നിന്ന് കുടുംബം തലനാരിഴക്ക് രക്ഷപ്പെട്ടു.
ദേവര്‍ ഷോലപഞ്ചായത്തിലെ നമ്പര്‍ ത്രി ഡിവിഷനിലെ മൂലവയല്‍ ആദിവാസി കോളനിയിലെ സോമന്റെ കുടുംബമാണ് രക്ഷപ്പെട്ടത്. കഴിഞ്ഞ ദിവസം രാത്രി 11നാണ് ഇവരുടെ വീടിന് നേരെ കാട്ടാനയുടെ ആക്രമണമുണ്ടായത്. വീടിന്റെ മുന്‍വശത്തെ വാതിലും ചുമരും തകര്‍ത്ത കാട്ടാന വീടിനകത്ത് കടക്കുകയായിരുന്നു. പിന്നീട് പിന്‍ഭാഗത്തെ വാതിലും ചുമരും തകര്‍ത്താണ് ആന പുറത്തിറങ്ങിയത്.
ഈ സമയം കുട്ടികള്‍ ഉള്‍പ്പെടെ എട്ടുപേര്‍ അടങ്ങുന്ന കുടുംബം വീട്ടിനകത്തുണ്ടായിരുന്നു. ആന പിന്‍ഭാഗത്ത് കൂടി പുറത്തിറങ്ങിയതോടെ ഇവര്‍ പുറത്തേക്കോടി രക്ഷപ്പെടുകയായിരുന്നു. സംഭവത്തില്‍ ആര്‍ക്കും പരുക്കേറ്റിട്ടില്ല. വിവരമറിഞ്ഞ് ദേവര്‍ഷോല പൊലിസും വനം വകുപ്പ് ഉദ്യോഗസ്ഥരും സംഭവ സ്ഥലത്തെത്തി. നഷ്ട പരിഹാരം ആവശ്യപ്പെട്ട് സോമന്‍ വനം വകുപ്പിനും പഞ്ചായത്തിനും പരാതി നല്‍കിയിട്ടുണ്ട്.