തിരുന്നാവായ: ഭാരതപ്പുഴയില്‍ കുടുങ്ങിയ കന്നുകാലികളെ രക്ഷപ്പെടുത്തുന്നതിന് നടപടികള്‍ തുടങ്ങി. ദേശീയ ദുരന്ത നിവാരണ സേന, മൃഗസംരക്ഷണ വകുപ്പ്, റവന്യു തുടങ്ങിയ തുടങ്ങിയ വകുപ്പുകളുടെ സംയുക്ത നേതൃത്വത്തിലാണ് നിളയില്‍ കുടുങ്ങിക്കിടക്കുന്ന കന്നുകാലികളെ കരക്കെത്തിക്കാന്‍ നടപടി ആരംഭിച്ചത്. കനത്ത മഴയില്‍ ഭാരതപ്പുഴയില്‍ ജലനിരപ്പ് ഉയര്‍ന്നതിനെ തുടര്‍ന്നാണ് കാലിക്കൂട്ടങ്ങള്‍ പുഴയില്‍ കുടുങ്ങിയത്. ഇത് സംബന്ധിച്ചുള്ള വാര്‍ത്ത ഇന്നലെ സുപ്രഭാതം പ്രസിദ്ധീകരിച്ചിരുന്നു.
അസിസ്റ്റന്റ് കമാന്‍ഡിങ് ഓഫിസര്‍ ടി.എം ജിതീഷിന്റെ നേതൃത്വത്തില്‍ തൃശ്ശൂരില്‍ നിന്നും എത്തിയ 45 ഓളം സേനാ അംഗങ്ങളാണ് രക്ഷാപ്രവര്‍ത്തനത്തില്‍ പങ്കാളികളായത്. ദേശീയ ദുരന്ത നിവാരണ സേനക്കൊപ്പം നാട്ടുകാരും രക്ഷാപ്രവര്‍ത്തനത്തില്‍ പങ്ക് ചേര്‍ന്നു. മൃഗ സംരക്ഷണ വകുപ്പ് മലപ്പുറം ഡെപ്യൂട്ടി ഡയറക്ടര്‍ ഡോ. ബി. സുരേഷിന്റെ നേതൃത്വത്തിലുള്ള സംഘം പുഴയുടെ ഇരു കരയിലും നിലയുറപ്പിച്ചിരുന്നു. ഡെപ്യൂട്ടി കലക്ടര്‍ അബ്ദുല്‍ റഷീദ്, തിരൂര്‍ തഹസില്‍ദാര്‍ യൂജിന്‍, ഡെപ്യൂട്ടി തഹസില്‍ദാര്‍ ജലീല്‍, തിരുന്നാവായ വില്ലേജ് ഓഫിസര്‍ ഉല്ലാസ്, വില്ലേജ് ഉദ്യോഗസ്ഥരായ എ.കെ അഷ്‌റഫ്, മനോജ്, കുറ്റിപ്പുറം നടുവട്ടം വില്ലേജ് ഓഫിസര്‍ അരുണന്‍ എന്നിവരുടെ നേതൃത്വത്തിലുള്ള റവന്യു സംഘം സംഭവ സ്ഥലത്ത് ക്യാംപ് ചെയ്തിരുന്നു. മാംസ കച്ചവടത്തിനും മറ്റും കൊണ്ടുവരുന്നവരാണ് കാലികളെ യഥേഷ്ടം പുല്ലും വെള്ളവും ലഭിക്കുമെന്നതിനാല്‍ പുഴയിലേക്ക് തള്ളിവിടുന്നത്. നിളയോരത്തെ കുറ്റിപ്പുറം, നരിപ്പറമ്പ്, തവനൂര്‍,ചെമ്പിക്കല്‍, തിരുന്നാവായ,ബീരാഞ്ചിറ, ചമ്രവട്ടം തുടങ്ങിയ പ്രദേശത്താണ് കന്നുകാലികളെ തള്ളി വിടുന്നത്.