വാദി ഖുബ (തൃശൂര്‍): സുന്നി മഹല്ല് ഫെഡറേഷന്‍ ദേശീയ പ്രതിനിധി സംഗമത്തില്‍ ഇതര സംസ്ഥാന പ്രതിനിധികള്‍ക്കുള്ള പ്രത്യേക സെഷനുകള്‍ ഇന്ന്. രാവിലെ 9.30 ന് നടക്കുന്ന 'തമദ്ദുന്‍' സെഷന്‍ ആള്‍ ഇന്ത്യാ സുന്നത്ത് ജമാഅത്ത് ജനറല്‍ സെക്രട്ടറി മൗലാനാ മതീന്‍ അഹ്മദ് കൊല്‍ക്കത്ത ഉദ്ഘാടനം ചെയ്യും. കേരളാ മുസ്്‌ലിം മാതൃകാ സമൂഹം, സാമൂഹിക സേവനത്തിന്റെ പ്രാധാന്യം എന്നീ വിഷയങ്ങളെ അധികരിച്ച് സഈദ് ഹുദവി മൂടാല്‍, ഡോ. സൂബൈര്‍ ഹുദവി ചേകന്നൂര്‍ സംസാരിക്കും.
ഡോ. ബഹാഉദ്ദീന്‍ മുഹമ്മദ് നദ്‌വി, ഉമര്‍ ഫൈസി മുക്കം, അബ്ദുസമദ് പൂക്കോട്ടൂര്‍ സംബന്ധിക്കും. 11.45 ന് നടക്കുന്ന തറഖി സെഷനില്‍ പ്രബോധകന്റെ കര്‍മ മണ്ഡലം, മാതൃകാ മഹല്ല് എന്നീ വിഷയങ്ങള്‍ ഷറഫുദ്ദീന്‍ ഹുദവി ആനമങ്ങാട്, മന്‍സൂര്‍ ഹുദവി അറഫ അവതരിപ്പിക്കും.
ഉച്ചക്ക് 1.00ന് നടക്കുന്ന തലാഷ് സെഷനില്‍ കേരളത്തിലെ മഹല്ല് സംവിധാനവും വിദ്യാഭ്യാസ പ്രവര്‍ത്തനങ്ങളും ഇതര സംസ്ഥാനങ്ങളില്‍ നടപ്പിലാക്കുന്നതിന് വേണ്ട കാര്യങ്ങളും കര്‍മ പദ്ധതികളും ദേശീയ പ്രതിനിധികളുമായി കൂടിയാലോചന നടത്തും.
ത്രിപുര, വെസ്റ്റ് ബംഗാള്‍, ആന്ധ്രാ പ്രദേശ്, ബിഹാര്‍, കര്‍ണാടക, തമിഴ്‌നാട് തുടങ്ങിയ സംസ്ഥാനങ്ങളില്‍നിന്നുള്ള പ്രതിനിധികളാണ് ചര്‍ച്ചയില്‍ സംബന്ധിക്കുക.