മൂവാറ്റുപുഴ: പൊരിവെയിലിലും അണമുറിയാത്ത ആവേശം പകര്‍ന്ന് യു.ഡി.എഫ് സ്ഥാനാര്‍ഥി അഡ്വ. ഡീന്‍ കുര്യാക്കോസിന്റെ മൂവാറ്റുപുഴ നിയോജക മണ്ഡലത്തിലെ തെരഞ്ഞെടുപ്പ് പര്യടനം. വാദ്യമേളങ്ങളും പ്ലക്കാര്‍ഡുകളുമായി ഇരുചക്രവാഹനങ്ങളുടെ അകമ്പടിയോടെ റോഡ് ഷോ നടത്തി ആവേശപൂര്‍വമാണ് പ്രവര്‍ത്തകര്‍ സ്ഥാനാര്‍ഥിക്ക് ഒരോ കേന്ദ്രങ്ങളിലും സ്വീകരണം ഒരുക്കിയത്.
പര്യടനത്തിനിടെ ഷാഫി പറമ്പില്‍ എം.എല്‍.എ കൂടി എത്തിയതോടെ ആവേശം ഉച്ചസ്ഥായിയില്‍ എത്തി. രാവിലെ പാലക്കുഴ പഞ്ചായത്തിലെ മാറികയില്‍ നിന്നാണ് സ്ഥാനാര്‍ഥിയുടെ ഇന്നലത്തെ പര്യടനം ആരംഭിച്ചത്. പര്യടന പരിപാടി കേരളാ കോണ്‍ഗ്രസ് (എം) വര്‍ക്കിങ് ചെയര്‍മാന്‍ പി.ജെ.ജോസഫ് എം.എല്‍.എ. ഉദ്ഘാടനം ചെയ്തു. മുന്‍ എം.എല്‍.എ മാരായ ജോണിനെല്ലൂര്‍ .ജോസഫ് വാഴയ്ക്കന്‍,
യു.ഡി.എഫ് നേതാക്കളായ കെ എം അബ്ദുല്‍ മജീദ്, എ. മുഹമ്മദ് ബഷീര്‍, ജോയി മാളിയേക്കല്‍, കെ.എം സലീം, വിന്‍സെന്റ് ജോസഫ്, അഡ്വ. വര്‍ഗീസ് മാത്യു, പി.പി എല്‍ദോസ്, ഉല്ലാസ് തോമസ്, കെ.എ തോമസ്, ജോസ് പെരുമ്പിളളിക്കുന്നേല്‍, പി.എസ് സലിം, മേരി പീറ്റര്‍, സിബി ജോര്‍ജ്, കെ.പി.ജോയി, വി.ആര്‍ പങ്കജാക്ഷന്‍ നായര്‍, ജോമോന്‍ കുന്നുംപുറം തുടങ്ങിയവര്‍ പ്രസംഗിച്ചു. പാലക്കുഴ ആരക്കുഴ കല്ലൂര്‍ക്കാട്, മഞ്ഞള്ളൂര്‍, ആയവന, പോത്താനിക്കാട്, പൈങ്ങോട്ടൂര്‍ പഞ്ചായത്തുകളിലെ നൂറോളം കേന്ദ്രങ്ങളില്‍ ഡീന്‍ കുര്യാക്കോസിന് സ്വീകരണം നല്‍കി. പൈങ്ങോട്ടൂര്‍ പഞ്ചായത്തിലെ കുളപ്പുറം കവലയില്‍ പര്യടനം സമാപിച്ചു.