ജയ്പൂര്‍: ഉപാധികളോടെ നിയമ സഭാ സമ്മേളനം നടത്താന്‍ ഉപാധികളോടെ അനുമതി ലഭിച്ചതിന് പിന്നാലെ സഭാംഗങ്ങളുമായി കൂടിക്കാഴ്ച നടത്തി രാജസ്ഥാന്‍ മുഖ്യമന്ത്രി അശോക് ഗെലോട്ട്. കൂടിക്കാഴ്ചയില്‍ ഗവര്‍ണറുടെ ചോദ്യങ്ങള്‍ക്കുള്ള മറുപടി തയ്യാറാക്കിയതായി അദ്ദേഹം മാധ്യമപ്രവര്‍ത്തകരോട് പറഞ്ഞു.

'ഗവണറുടെ ചോദ്യങ്ങള്‍ക്കുള്ള മറുപടിക്ക് ഞങ്ങള്‍ രൂപം നല്‍കിയിട്ടുണ്ട്. നിയമസഭ വിളിച്ചു ചേര്‍ക്കുക എന്നത് ഞങ്ങലുടെ അവകാശമാണ്. സെഷന്‍സ് എങ്ങനെ നടത്തണമെന്ന് തീരുമാനിക്കേണ്ടത് സ്പീക്കറുടെ സവിശേഷ അധികാരത്തില്‍ പെട്ടതാണ്. ജൂലൈ 31ന് സെഷന്‍ നടത്താനാണ് ഞങ്ങള്‍ ആഗ്രഹിക്കുന്നത്'- രാജസ്ഥാന്‍ മന്ത്രി ഹരിഷ് ചൗധരി പറഞ്ഞതായി എന്‍.ഡി.ടി.വി റിപ്പോര്‍ട്ട് ചെയ്യുന്നു.

നിയമസഭ ചേരാനുള്ള സര്‍ക്കാരിന്റെ ശുപാര്‍ശ ആദ്യം ഗവര്‍ണര്‍ കല്‍രാജ് മിശ്ര തള്ളിയിരുന്നു. കൂടുതല്‍ വിവരങ്ങള്‍ ആവശ്യപ്പെട്ടുക്കൊണ്ടാണ് ഗവര്‍ണര്‍ ശുപാര്‍ശ തള്ളിയത്.

എന്നാല്‍ പിന്നീട് ഉപാധികളോടെ നിയമസഭ വിളിക്കാമെന്ന് ഗവര്‍ണര്‍ അറിയിച്ചു. സര്‍ക്കാര്‍ 21 ദിവസത്തെ നോട്ടിസ് നല്‍കണമെന്നാണ് ഗവര്‍ണറുടെ ഒരു ഉപാധി.