നടുവണ്ണൂര്‍: കരുവണ്ണൂരില്‍ ആരംഭിച്ച സിവില്‍ സപ്ലൈസ്  ഡിപ്പോയില്‍ സംഭരിക്കാന്‍ കൊണ്ടുവന്ന അഞ്ചു ലോഡ്  ഗോതമ്പ് സര്‍വകക്ഷി തൊഴിലാളി സംയുക്ത സമരസമിതി അംഗങ്ങളുടെ എതിര്‍പ്പുമൂലം ഇറക്കാന്‍ കഴിയാതെ  തിരികെ കൊണ്ടുപോയി.
ഇന്നലെ രാവിലെ 10ഓടെയാണ് അഞ്ചു ലോറികളിലായി ഗോതമ്പ് തിക്കോടി എഫ്.സി.ഐയില്‍നിന്ന് എത്തിയത്. നേരത്തെ സംഭരണം നടത്തിയ കൊയിലാണ്ടി ഗോഡൗണില്‍ നിന്ന് 67 കയറ്റിറക്ക് തൊഴിലാളികളും എത്തിയിരുന്നു.
താലൂക്ക് സപ്ലൈ ഓഫിസര്‍ തുളസി, കൊയിലാണ്ടി സപ്ലൈകോ ഡിപ്പോ മാനേജര്‍ എന്‍.കെ ശ്രീജ, ജൂനിയര്‍ മാനേജര്‍ ടി.സി സജീവന്‍, കരുവണ്ണൂര്‍  ഡിപ്പോയുടെ ചുമതലയുള്ള റേഷനിങ് ഇന്‍സ്‌പെക്ടര്‍ ടി.പി രമേശന്‍ എന്നിവരുടെ നേതൃത്വത്തില്‍ മറ്റു സപ്ലൈകോ ഉദ്യോഗസ്ഥരും ഇറക്കിവെയ്ക്കല്‍ നടപടി നിര്‍വഹിക്കാന്‍ എത്തിയിരുന്നു. പേരാമ്പ്ര, കുറ്റ്യാടി എസ്.ഐ  എന്നിവരുടെ നേതൃത്വത്തില്‍ പൊലിസും എം.എസ്.പിയും സ്ഥലത്തെത്തിയിരുന്നു.
കൊയിലാണ്ടിയില്‍ നിന്നു വന്ന 67 തൊഴിലാളികളെയും പ്രാദേശികമായി നിയോഗിക്കുന്ന പത്തു തൊഴിലാളികളെയും വച്ച് ഇറക്കിവയ്ക്കാനായിരുന്നു അധികൃതര്‍ ഉദ്ദേശിച്ചത്. എന്നാല്‍ പകുതി പ്രാദേശിക തൊഴിലാളികളെ നിയോഗിക്കണമെന്ന് സമരസമിതി നേതാക്കള്‍ നിര്‍ദേശം വക്കുകയായിരുന്നു.
ഈ നിര്‍ദേശം കൊയിലാണ്ടിയില്‍ നിന്ന് വന്ന തൊഴിലാളി പ്രതിനിധികള്‍ അംഗീകരിച്ചില്ല. ഒരു മണിയായിട്ടും ഇറക്കിവയ്ക്കാന്‍ കഴിയാത്തതിനെ തുടര്‍ന്ന് ജില്ലാ സപ്ലൈ ഓഫിസര്‍ എന്‍.കെ പ്രഭാകരന്‍ എത്തി സമരസമിതി നേതാക്കളും കൊയിലാണ്ടിയിലെ ട്രേഡ് യൂനിയന്‍ നേതാക്കളുമായി ചര്‍ച്ച നടത്തിയെങ്കിലും സമവായത്തിലെത്താന്‍ കഴിഞ്ഞില്ല. തുടര്‍ന്ന് ലോഡ് നാലരയോടെ വാവാട് സബ് ഡിവിഷന്‍ ഡിപ്പോയിലേക്കു കൊണ്ടുപോയി.