കൊണ്ടോട്ടി: പുളിക്കല്‍ പുതിയേടത്ത്പറമ്പില്‍ ചാരായം വാറ്റുന്നതിനിടെ രണ്ടുപേര്‍ അറസ്റ്റില്‍. പുതിയേടത്ത് പറമ്പ് കോളനിയില്‍ ഇയ്യക്കുന്നന്‍ വേലായുധന്‍ (51), പുറായി വീട്ടില്‍ ചെറുതൊടി സി.പി രാമന്‍(48) എന്നിവരെയാണ് കൊണ്ടോട്ടി എസ്.ഐ കെ.എ സാബുവിന്റെ നേതൃത്വത്തിലുള്ള പൊലിസ് സംഘം പിടികൂടിയത്.
ഇന്നലെ പുലര്‍ച്ചെ 12.30ഓടെ പുതിയേടത്ത്പറമ്പ് അങ്ങാടിക്ക് സമീപത്തെ ഒഴിഞ്ഞപറമ്പില്‍ വച്ച് ചാരായം വാറ്റുന്നതിനിടെയാണ് ഇരുവരും പിടിയിലായത്. നാല് ലിറ്റര്‍ ചാരായവും വാറ്റുപകരണങ്ങളും ഇവരില്‍ നിന്ന് കണ്ടെടുത്തു. ജില്ലാ പൊലിസ് മേധാവിയുടെ നിര്‍ദേശപ്രകാരമാണ് പൊലിസ് പരിശോധന നടത്തിയത്.എ.എസ്.ഐ കെ. സന്തോഷ്, സീനിയര്‍ സി.പി.ഒ പി. സജു, സി.പി.ഒമാരായ കബീര്‍, ഷാജി, ജോഷി എന്നിവരടങ്ങുന്ന സംഘമാണ് പ്രതികളെ പിടികൂടിയത്. മലപ്പുറം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ 14 ദിവസത്തേക്ക് റിമാന്‍ഡ് ചെയ്തു.