കൊവിഡ് നിയമലംഘനത്തിന് 

പിഴ അപ്പോള്‍ തന്നെ

 

 

തിരുവനന്തപുരം: കൊവിഡ് മാര്‍ഗ നിര്‍ദേശങ്ങള്‍ ലംഘിച്ചതിന് പിടിയിലാകുന്നവര്‍ അപ്പോള്‍ തന്നെ പിഴ അടയ്ക്കണം. 

ഇന്നലെ മുതല്‍ പൊലിസ് ഇത് നടപ്പിലാക്കിത്തുടങ്ങി. കൊവിഡ് ബാധിത പ്രദേശങ്ങളില്‍ ലോക്ക് ഡൗണ്‍ ലംഘനം നടത്തുക, കണ്ടെയ്ന്‍മെന്റ് സോണുകളില്‍ അകത്തേക്കും പുറത്തേക്കുമുള്ള അനാവശ്യ സഞ്ചാരം, പൊതു സ്ഥലത്ത് മാസ്‌ക് ധരിക്കാതിരിക്കുക, സാമൂഹ്യ അകലം പാലിക്കാതിരിക്കുക, കൊവിഡ് സുരക്ഷാ മാനദണ്ഡം പാലിക്കാതെ മരണാനന്തര ചടങ്ങുകള്‍ നടത്തുക, പൊതു ഇടങ്ങളിലും റോഡുകളിലും തുപ്പുക എന്നീ കുറ്റങ്ങള്‍ക്ക് 200 രൂപയും, സുരക്ഷാ മാനദണ്ഡം പാലിക്കാതെ മതപരമായ ചടങ്ങുകളും മറ്റും നടത്തല്‍, കടകളിലും മാളുകളിലും ഓഫിസുകളിലും ആള്‍ക്കൂട്ടമുണ്ടാകല്‍, അതിഥി തൊഴിലാളികള്‍ ക്വാറന്റൈന്‍ ലംഘിക്കല്‍, കൊവിഡ് മാനദണ്ഡം പാലിക്കാതെ നടത്തുന്ന കടകള്‍ മറ്റു വാണിജ്യ സ്ഥാപനങ്ങള്‍ എന്നിവയ്ക്ക് പിഴ 500 രൂപയായിരിക്കും. 

നിരീക്ഷണത്തിലുള്ള ആള്‍ ക്വറന്റൈന്‍ ലംഘിക്കല്‍, കൊവിഡ് മാനദണ്ഡം പാലിക്കാതെ വിവാഹ ചടങ്ങുകള്‍ നടത്തുന്നവര്‍, ജാഥകള്‍, സമ്മേളനങ്ങള്‍, ഘോഷയാത്ര എന്നിവ നടത്തുന്നവര്‍, കൊവിഡ് പ്ലാറ്റ് ഫോമില്‍ തെറ്റായ വിവരങ്ങള്‍ നല്‍കുന്നവര്‍ എന്നിവര്‍ക്ക് 1,000 രൂപയായിരിക്കും പിഴ. 

നിലവിലെ സര്‍ക്കാര്‍ മാനദണ്ഡം ലംഘിച്ച് പൊതു, സ്വകാര്യ വാഹന ഗതാഗതം നടത്തുന്നവര്‍ക്ക് 2,000 രൂപയും, ഇതര സംസ്ഥാന വാഹന ഗതാഗതം നടത്തുന്നവര്‍ക്ക് 5,000 രൂപയുമായിരിക്കും പിഴ.