മാഹി: വിദ്യാര്‍ഥികള്‍ വിമര്‍ശനങ്ങളെ നേരിടാന്‍ കരുത്തു നേടണമെന്ന് കണ്ണൂര്‍ സര്‍വകലാശാല വി.സി ഡോ. എം.കെ അബ്ദുള്‍ഖാദര്‍ പറഞ്ഞു. ചെറുകല്ലായി രാജീവ് ഗാന്ധി ആര്‍ട്‌സ് സ്‌പോര്‍ട്‌സ് ക്ലബ് സംഘടിപ്പിച്ച ഉന്നത വിജയികള്‍ക്കുള്ള അനുമോദനസമ്മേളനം ഉദ്ഘാടനം ചെയ്തുസംസാരിക്കുകയായിരുന്നു അദ്ദേഹം.
സ്വന്തം കാലില്‍ നില്‍ക്കാനുള്ള കഴിവ് ആര്‍ജിക്കുന്നതോടൊപ്പം കഴിവുകള്‍ പ്രകടിപ്പിക്കാനുള്ള ആത്മവിശ്വാസവും വിദ്യാഭ്യാസത്തിലൂടെ നേടണമെന്ന് വി.സി കൂട്ടിച്ചേര്‍ത്തു. മാഹി സഹകരണ ബി.എഡ് കോളജില്‍ നടന്ന ചടങ്ങില്‍ മുന്‍മന്ത്രി ഇ.വത്സരാജ് അധ്യക്ഷനായി. മാഹി മേഖലയില്‍ നിന്നും എസ്.എസ്.എല്‍.സി, പ്ലസ്ടു, ഫ്രഞ്ച് ബ്രവെ പരീക്ഷകളില്‍ എ പ്ലസ് നേടിയ വിദ്യാര്‍ഥികളെ ചടങ്ങില്‍ അനുമോദിച്ചു. ടി സുരേന്ദ്രബാബു, എം രവീന്ദ്ര, ജാഫര്‍, ജോസ് ബേസില്‍ ഡിക്രൂസ് സംസാരിച്ചു.