ആലപ്പുഴ: നാണയം വിഴുങ്ങിയ മൂന്ന് വയസുകാരന്‍ മരിച്ച സംഭവത്തില്‍ വിശദീകരണവുമായി ആലപ്പുഴ ഗവ.മെഡിക്കല്‍ കോളജ് അധികൃതര്‍. ആശുപത്രിയില്‍ നിന്ന് ഡിസ്ചാര്‍ജ് ചെയ്യുമ്പോള്‍ കുട്ടി പൂര്‍ണ ആരോഗ്യവാനായിരുന്നുവെന്ന് മെഡിക്കല്‍ കോളജ് സൂപ്രണ്ട് ഡോ. ആര്‍.വി രാംലാല്‍  പറഞ്ഞു. 

ശനിയാഴ്ച വൈകിട്ട് 2.30 ഓടെയാണ് കുട്ടിയെ ആലപ്പുഴ മെഡിക്കല്‍ കോളജ് കുട്ടികളുടെ വിഭാഗത്തില്‍ എത്തിച്ചത്. രാവിലെ നാണയം വിഴുങ്ങി എന്നായിരുന്നു കുട്ടിയുടെ അമ്മ പറഞ്ഞത്. 

കുട്ടിക്ക് ശ്വാസം മുട്ടലോ മറ്റ് അസുഖങ്ങളോ ഉണ്ടായിരുന്നില്ല. പരിശോധനയിലും കുട്ടിക്ക് ശ്വാസതടസമോ വയര്‍ പെരുക്കമോ ഉണ്ടായിരുന്നില്ല. രണ്ട് തവണ എക്‌സ്‌റേ എടുത്തപ്പോഴും നാണയത്തിന്റെ നിഴല്‍ ആമാശയത്തിലായിരുന്നു. 

കുട്ടിയെ പീഡിയാട്രിക്, മെഡിസിന്‍, പീഡിയാട്രിക് സര്‍ജറി എന്നി വിഭാഗങ്ങളിലെ ഡോക്ടര്‍മാര്‍ പരിശോധിച്ചു. ശാസ്ത്രീയമായി ഈ കുട്ടിക്ക് ഓപറേഷന്‍ ചെയ്യുകയോ ട്യൂബ് ഇട്ടു നോക്കേണ്ട ആവശ്യമോ ഇല്ലായിരുന്നു.  

സാധാരണ ഭക്ഷണം നല്‍കുകയും ധാരാളം വെള്ളം കുടിപ്പിക്കുകയും ചെയ്യാനും കുട്ടിയുടെ മലം നിരീക്ഷിക്കാനും അമ്മയെ ഉപദേശിച്ചുവെന്നും ആവശ്യമുണ്ടെങ്കില്‍ ഒരാഴ്ച കഴിഞ്ഞ് വരാനും നിര്‍ദേശിച്ചതായി ആശുപത്രി സൂപ്രണ്ട് അറിയിച്ചു.