ലണ്ടന്‍: ഇംഗ്ലീഷ് പ്രീമിയര്‍ ലീഗ് ക്ലബ് ടോട്ടന്‍ഹാം ഹോട്‌സ്പറിന്റെ യുറുഗ്വായ് മധ്യനിര താരം റോഡ്രിഗോ ബെന്റാന്‍കൂറിന് വിലക്ക്. സഹതാരത്തെ വംശീയമായി അധിക്ഷേപിച്ചതിനാണ് വിലക്ക്.

ടോട്ടന്‍ഹാമിന്റെയും ദക്ഷിണ കൊറിയയുടെയും നായകനായ സണ്‍ ഹ്യൂങ് മിങ്ങിനെ കുറിച്ച് വംശീയ അധിക്ഷേപം ഉള്‍പ്പെടുന്ന പരാമര്‍ശം നടത്തിയതിനാണ് ഫുട്ബാള്‍ അസോസിയേഷന്‍ നടപടിയെടുത്തത്. താരത്തിന് ഏഴ് ആഭ്യന്തര മത്സരങ്ങളില്‍ വിലക്കും, 100,000 പൗണ്ട് പിഴയും ചുമത്തി. ജൂണില്‍ യുറുഗ്വായില്‍ നടന്ന ഒരു ടെലിവിഷന്‍ അഭിമുഖത്തിനിടെയയിരുന്നു അധിക്ഷേപ പരാമര്‍ശം.

പരാമര്‍ശം വിവാദമായതോടെ താരം സമൂഹമാധ്യമങ്ങളിലൂടെ ഖേദം പ്രകടിപ്പിച്ചിരുന്നു. പ്രീമിയര്‍ ലീഗില്‍ മാഞ്ചസ്റ്റര്‍ സിറ്റി, ഫുള്‍ഹാം, ബൗണ്‍മൗത്ത്, ചെല്‍സി, സതാംപ്ടണ്‍, ലിവര്‍പൂള്‍ എന്നീ ക്ലബുകള്‍ക്കെതിരായ മത്സരം താരത്തിന് നഷ്ടമാകും. ഡിസംബര്‍ 19ന് നടക്കുന്ന മാഞ്ചസ്റ്റര്‍ യുനൈറ്റഡിനെതിരായ കരബാവോ കപ്പ് ക്വാര്‍ട്ടര്‍ ഫൈനല്‍ മത്സരത്തിലും താരത്തിന് കളിക്കാനാകില്ല. അതേസമയം, യൂറോപ്പ ലീഗില്‍ താരത്തിന് കളിക്കാനാകും.

 Tottenham midfielder Rodrigo Bentancur receives 7-match domestic ban and £100,000 fine for racial slur against Heung-Min Son, violating FA Rule E3.