ജനീവ: പാകിസ്താന്റെ അഭ്യര്‍ഥന പരിഗണിച്ച് കശ്മിര്‍ പ്രശ്‌നം ഒരിക്കല്‍ കൂടി യു.എന്‍ രക്ഷാസമിതി ചര്‍ച്ചയ്‌ക്കെടുത്തു. ഇത് മൂന്നാം തവണയാണ് കശ്മിര്‍ യു.എന്‍ പരമോന്നത സമിതി മുമ്പാകെ വരുന്നത്.
എന്നാല്‍ വിഷയത്തില്‍ ഒരു പ്രസ്താവന പോലും സമിതി പുറപ്പെടുവിച്ചിട്ടില്ല. അനൗപചാരിക ചര്‍ച്ചയാണ് നടന്നത്.
അതേസമയം ഇന്ത്യയുമായി സംഘര്‍ഷത്തിലുള്ള ചൈന പാകിസ്താനെ അനുകൂലിച്ചു. കശ്മിരിലെ നിലവിലെ സ്ഥിതിഗതികളിലും സൈനിക നടപടികളിലും ചൈന ആശങ്ക പ്രകടിപ്പിച്ചു.
കശ്മിരിലെ അവസ്ഥ സങ്കീര്‍ണമാക്കുന്ന ഏകപക്ഷീയ നടപടികളെ എതിര്‍ക്കുന്നതായി ചൈനീസ് പ്രതിനിധി വ്യക്തമാക്കി.
കശ്മിരിലെ മനുഷ്യാവകാശ ലംഘനങ്ങള്‍ ചൂണ്ടിക്കാട്ടിയ പാക് വിദേശകാര്യ മന്ത്രി ഷാ മഹ്മൂദ് ഖുറൈശി വിഷയം ചര്‍ച്ചയ്‌ക്കെടുത്തതിന് 15 രക്ഷാസമിതി അംഗങ്ങള്‍ക്കും, വിശേഷിച്ച് ചൈനയ്ക്ക് നന്ദി അറിയിച്ചു.
അതേസമയം കശ്മിര്‍ പ്രശ്‌നം ഇന്ത്യയും പാകിസ്താനും ഉഭയകക്ഷി ചര്‍ച്ചയിലൂടെ പരിഹരിക്കേണ്ട വിഷയമാണെന്ന നിലപാടാണ് രക്ഷാസമിതിയിലെ മിക്ക അംഗങ്ങളും സ്വീകരിച്ചത്.
പാകിസ്താന്റെ മറ്റൊരു നീക്കം കൂടി പരാജയപ്പെട്ടെന്ന് യോഗത്തിനു ശേഷം ഇന്ത്യയുടെ പുതിയ യു.എന്‍ അംബാസഡര്‍ ടി.എസ് തിരുമൂര്‍ത്തി ട്വീറ്റി.