കരിപ്പൂര്‍: കോഴിക്കോട് വിമാനത്താവളത്തിലുണ്ടായ വിമാനാപകടത്തില്‍ ഇതുവരേ 17 പേര്‍ മരിച്ചതായി ജില്ലാ കലക്ടര്‍ കെ. ഗോപാലകൃഷ്ണന്‍ അറിയിച്ചു. 190 യാത്രക്കാരുമായി ദുബൈയില്‍ നിന്ന് കോഴിക്കോട്ടേക്കു തിരിച്ച വിമാനം വൈകിട്ട് 7.45 ഓടെയാണ് അപകടത്തില്‍ പെട്ടത്. പരുക്കേറ്റവരിലെ 110 പേരെ കോഴിക്കോട്ടെ വിവിധ ആശുപത്രികളില്‍ പ്രവേശിപ്പിച്ചിരുന്നു. ഇതില്‍ പതിനൊന്നുപേര്‍ മരിച്ചു. പൈലറ്റും സഹപൈലറ്റും മരിച്ചു.

എണ്‍പതുപേരെ മലപ്പുറം ജില്ലയിലെ വിവിധ ആശുപത്രികളിലും പ്രവേശിപ്പിച്ചു. ഇതില്‍ ആറുപേരും മരിച്ചു. രണ്ടു ജില്ലകളിലെ 13 ആശുപത്രികളിലാണ് പരുക്കേറ്റവരെ പ്രവേശിപ്പിച്ചിരിക്കുന്നത്. നേരത്തെ രണ്ടുപേരെ കാണാനില്ലെന്ന വിവരമുണ്ടായിരുന്നു. അതില്‍ കാര്യമില്ലെന്ന് ജില്ലാകലട്കര്‍ അറിയിച്ചു. വിമാനത്തിനിടയില്‍ ആരുമില്ലെന്ന് ഉറപ്പാക്കിയിട്ടുണ്ടെന്നും അദ്ദേഹം അറിയിച്ചു.

അതേ സമയം ഇനി പരുക്കേറ്റ് ചികിത്സയില്‍ കഴിയുന്നവരെക്കുറിച്ചാണ് ആലോചിക്കേണ്ടതെന്നും അവരുടെ കണക്കെടുക്കണമെന്നും ഇവര്‍ക്കാവശ്യമായ ചികിത്സ സംസ്ഥാന സര്‍ക്കാര്‍ ഉറപ്പാക്കുമെന്നും മന്ത്രി എ.സി മൊയ്തീന്‍ അറിയിച്ചു. സൈധ്യമായ എല്ലാകാര്യങ്ങളും ചെയ്യുമെന്നും അദ്ദേഹം അറിയിച്ചു.