മുല്ലപ്പെരിയാര്‍ ജലനിരപ്പ് 135 അടി

സ്വന്തം ലേഖകന്‍

തൊടുപുഴ: 2018 ഓഗസ്റ്റിന് സമാനമായ രീതിയില്‍ സംസ്ഥാനത്തെ അണക്കെട്ടുകളിലെ ജലനിരപ്പ് കുതിച്ചുയരുന്നു. ഓഗസ്റ്റ് ഒന്നു മുതല്‍ ഇന്നലെ വരെയുള്ള ഏട്ടു ദിവസം കൊണ്ട് മാത്രം ജലനിരപ്പില്‍ വന്‍ വര്‍ധനവാണ് ഉണ്ടായത്. 

ഓഗസ്റ്റ് ഒന്നിന് സംസ്ഥാനത്തെ വൈദ്യുതി ബോര്‍ഡ് അണക്കെട്ടുകളിലെ ജലശേഖരം 32 ശതമാനമായിരുന്നു. ഇന്നലെ രാവിലെ ഇത് 54 ശതമാനത്തിലെത്തി. നീരൊഴുക്ക് പ്രതീക്ഷിച്ചതിന്റെ മൂന്നിരട്ടിയിലധികമാണ്. ഇക്കാലയളവില്‍ 367.839 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് അണക്കെട്ടുകളിലേക്ക് പ്രതീക്ഷിച്ചിരുന്നതെങ്കിലും 1,112.896 ദശലക്ഷം യൂനിറ്റിനുള്ള വെള്ളം ഒഴുകിയെത്തി. ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ മാത്രം 305.6 ദശലക്ഷം യൂനിറ്റ് വൈദ്യുതിക്കുള്ള വെള്ളമെത്തി. 2,239.435 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളം നിലവിലുണ്ട്. ഓഗസ്റ്റ് ഒന്നിന് 1321.81 ദശലക്ഷം യൂനിറ്റിനുള്ള വെള്ളമാണ് ഉണ്ടായിരുന്നത്. 

ഇടുക്കി അണക്കെട്ടിലെ ജലനിരപ്പ് ഇന്നലെ മാത്രം 5.64 അടി ഉയര്‍ന്ന് 2,358.94 അടിയിലെത്തി.  ഇത് സംഭരണശേഷിയുടെ 53 ശതമാനമാണ്. അണക്കെട്ടിലേക്ക് ശക്തമായ നീരൊഴുക്കാണ്.135 അടിയാണ് മുല്ലപ്പെരിയാര്‍ അണക്കെട്ടിലെ ഇന്നലെ വൈകിട്ടത്തെ ജലനിരപ്പ്. 142 അടിയിലാണ്  പരമാവധി സംഭരണം നിജപ്പെടുത്തിയിരിക്കുന്നതെങ്കിലും 138ല്‍ എത്തിയാല്‍ സ്പില്‍വേ ഷട്ടര്‍ ഉയര്‍ത്തി ഇടുക്കിയിലേക്ക് ഒഴുക്കാനാണ് സാധ്യത. മുല്ലപ്പെരിയാര്‍ ജലം കൂടി എത്തിയാല്‍ ഇടുക്കി അണക്കെട്ടിലെ ജലനിരപ്പ് കുതിച്ചുയരും. നാല് ദിവസത്തിനിടെ 20 അടിയോളം ജലനിരപ്പാണ് മുല്ലപ്പെരിയാറില്‍ വര്‍ധിച്ചത്. കൂടുതല്‍ ജലം കൊണ്ടുപോകണമെന്ന് കേരളം തമിഴ്‌നാടിനോട് ആവശ്യപ്പെട്ടിട്ടുണ്ട്.