കട്ടാങ്ങല്‍: പെണ്‍കുട്ടികള്‍ക്ക് ഇസ്‌ലാമികാന്തരീക്ഷത്തില്‍ ഉന്നതപഠനം സാധ്യമാക്കുകയെന്ന ലക്ഷ്യത്തോടെ താത്തൂര്‍ കേന്ദ്രമായി ആരംഭിക്കുന്ന നിസ്‌വ വിമന്‍സ് കോളജിന്റെ ലോഞ്ചിങ് സമസ്ത മുശാവറ അംഗവും ദാറുല്‍ഹുദ വി.സിയുമായ ഡോ. ബഹാഉദ്ദീന്‍ മുഹമ്മദ് നദ്‌വി നിര്‍വഹിച്ചു. പെണ്‍കുട്ടികളുടെ വിദ്യാഭ്യാസം കാലഘട്ടത്തിന്റെ ആവശ്യമാണെന്നും അതിനായി സമൂഹം ഉണരണമെന്നും അദ്ദേഹം പറഞ്ഞു.
എസ്.എസ്.എല്‍.സി കഴിഞ്ഞ പെണ്‍കുട്ടികള്‍ ഇസ്‌ലാമിക മേഖലയില്‍ ഉന്നതപഠനവും ഭൗതിക രംഗത്ത് പ്ലസ്ടു, ഡിഗ്രി എന്നിവയും ലഭ്യമാക്കുന്ന വിദ്യാഭ്യാസ പദ്ധതിയാണ് നിസ്‌വ. പാണക്കാട് സയ്യിദ് അബ്ബാസലി ശിഹാബ് തങ്ങളുടെ നേതൃത്വത്തിലാണ് പദ്ധതി പ്രവര്‍ത്തനം.
ചടങ്ങില്‍ വൈസ് ചെയര്‍മാന്‍ മുസ്തഫ മുണ്ടുപാറ അധ്യക്ഷനായി. യു.കെ ഇബ്‌റാഹിം ഓമശ്ശേരി (ദമാം) മുസ്തഫ (യാമ്പൂ), സലാം ഫൈസി മുക്കം, കുഞ്ഞാലന്‍ കുട്ടി ഫൈസി, നൂറുദ്ദീന്‍ ഫൈസി, യൂസുഫ് ഫൈസി, അയ്യൂബ് കൂളിമാട്, ശുക്കൂര്‍ മാസ്റ്റര്‍, അസീസ് പുള്ളാവൂര്‍, കുഞ്ഞിമരക്കാര്‍ മലയമ്മ, നിഹാല്‍ വാഫി, എം.പി ഹംസ മാസ്റ്റര്‍, ഡോ. മോയിന്‍ ഹുദവി മലയമ്മ, ലുഖ്മാന്‍ തങ്ങള്‍, പി.ടി അബ്ദുല്ല, അബൂ മൗലവി അമ്പലക്കണ്ടി സംബന്ധിച്ചു.
നിസ്‌വ കണ്‍വീനര്‍ അബൂബക്കര്‍ ഫൈസി മലയമ്മ സ്വാഗതവും ട്രഷറര്‍ കെ.പി കോയ നന്ദിയും പറഞ്ഞു.