തിരുവനന്തപുരം: മോട്ടോര്‍ വാഹന വകുപ്പിന്റെ സേവനങ്ങള്‍ പുതിയ സോഫ്റ്റ്‌വെയറിലേക്ക് മാറ്റുന്ന സാഹചര്യത്തില്‍ വാഹന ഉടമകള്‍ അവരുടെ ഫോണ്‍ നമ്പറുകള്‍ ഓണ്‍ലൈനിലൂടെ അപ്‌ഡേറ്റ് ചെയ്യണമെന്ന് നിര്‍ദേശം. 

പരിവാഹന്‍ എന്ന വെബ്‌സൈറ്റില്‍ അപ്‌ഡേറ്റ് മൊബൈല്‍ നമ്പര്‍ എന്ന ലിങ്കിലൂടെ വാഹന ഉടമകള്‍ക്ക് അവരുടെ മൊബൈല്‍ നമ്പറുകള്‍ അപ്‌ഡേറ്റ് ചെയ്യാനാകും. 

നിലവില്‍ രജിസ്റ്റര്‍ ചെയ്ത മൊബൈല്‍ നമ്പറിലൂടെ ആയിരിക്കും വാഹനവുമായി ബന്ധപ്പെട്ട് മോട്ടോര്‍ വാഹന വകുപ്പിന്റെ വിവരങ്ങളെല്ലാം ലഭിക്കുക. നിലവില്‍ രജിസ്റ്റര്‍ ചെയ്ത പല നമ്പറുകളും പഴയ ഉടമകളുടേയോ, പഴയ നമ്പറോ മറ്റോ ആണ്. 

ഇതാകട്ടെ അറിയിപ്പുകള്‍ വാഹന ഉടമകള്‍ക്ക് അതത് സമയം ലഭിക്കുന്നതിന് തടസമാകുകയും ചെയ്യുന്നു. 

അതുകൊണ്ടാണ് വാഹന ഉടമകള്‍ അവരുടെ മൊബൈല്‍ നമ്പറുകള്‍ അപ്‌ഡേറ്റ് ചെയ്യണമെന്ന് മോട്ടോര്‍ വാഹന വകുപ്പ് നിര്‍ദേശിച്ചിരിക്കുന്നത്.