തൊടുപുഴ: മണ്‍സൂണ്‍ രണ്ട് മാസം പിന്നിട്ടിട്ടും ജലനിരപ്പുയരാതിരുന്ന വൈദ്യുതി ബോര്‍ഡ് - ജലവിഭവ വകുപ്പ് അണക്കെട്ടുകള്‍ 12 ദിവസം കൊണ്ട് ജലസമൃദ്ധം.
ഓഗസ്റ്റ് ഒന്നു മുതല്‍ ഇന്നലെ രാവിലെ വരെ വൈദ്യുതി ബോര്‍ഡ് അണക്കെട്ടുകളില്‍ ഒഴുകിയെത്തിയത് ഒരു മാസം കൊണ്ട് പ്രതീക്ഷിച്ചതിലും അധികം ജലം. 1629 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് കെ.എസ്.ഇ.ബി ലോഡ് ഡെസ്പാച്ച് സെന്റര്‍ ഒരു മാസം കൊണ്ട് പ്രതീക്ഷിച്ചിരുന്നത്. എന്നാല്‍ 12 ദിവസം കൊണ്ട് ഒഴുകിയെത്തിയത് 1727.5 ദശലക്ഷം യൂനിറ്റിനുള്ള വെള്ളമാണ്. ജലവിഭവ വകുപ്പിനു കീഴിലുള്ള 20 അണക്കെട്ടുകളില്‍ 12 ലും ജലനിരപ്പ് ഉയര്‍ന്നതിനെ തുടര്‍ന്നു നിയന്ത്രിത അളവില്‍ വെള്ളം തുറന്നുവിട്ടിരിക്കുകയാണ്.
ഓഗസ്റ്റ് ഒന്നിന് കെ.എസ്.ഇ.ബി ഡാമുകളില്‍ മൊത്തം 32 ശതമാനം വെള്ളമാണ് ഉണ്ടായിരുന്നത്. എന്നാല്‍ ഇന്നലെയത് 64 ശതമാനമായി.
കാറ്റഗറി ഒന്നില്‍പ്പെട്ട വലിയ അണക്കെട്ടുകളായ ഇടുക്കി, പമ്പ, കക്കി, ഷോളയാര്‍, ഇടമലയാര്‍, കുണ്ടള, മാട്ടുപ്പെട്ടി എന്നിവിടങ്ങളില്‍ 63 ശതമാനവും കാറ്റഗറി രണ്ടിലെ കുറ്റ്യാടി, തരിയോട്, ആനയിറങ്കല്‍, പൊന്‍മുടി ഡാമുകളില്‍ 75 ശതമാനവും മൂന്നില്‍പ്പെട്ട നേര്യമംഗലം, പെരിങ്ങല്‍, ചെങ്കുളം, ലോവര്‍പെരിയാര്‍, കക്കാട് അണക്കെട്ടുകളില്‍ 73 ശതമാനവും വെള്ളം നിലവിലുണ്ട്. ഏറ്റവും വലിയ അണക്കെട്ടായ ഇടുക്കിയില്‍ ഇന്നലെ ഉച്ചയ്ക്ക് ഒന്നിന് 2370.18 അടിയായിരുന്നു ജലനിരപ്പ്.
ഇതു സംഭരണ ശേഷിയുടെ 64.18 ശതമാനമാണ്. കഴിഞ്ഞ 12 ദിവസത്തിനുള്ളില്‍ ഉയര്‍ന്നത് 33.84 അടി ജലനിരപ്പാണ്. കുറഞ്ഞദിവസങ്ങള്‍ക്കുള്ളില്‍ അണക്കെട്ടിലെ ജലനിരപ്പ് ഇത്രയും ഉയരുന്നത് റിക്കാര്‍ഡാണ്.
ഇതിനിടെ കാലവര്‍ഷം വീണ്ടും ശക്തമായാല്‍ ഇടുക്കി അണക്കെട്ട് തുറക്കേണ്ട സാഹചര്യം ഒഴിവാക്കാനുള്ള ശ്രമം ബോര്‍ഡ് ആരംഭിച്ചിട്ടുണ്ട്. ഇതിന്റെ ഭാഗമായി മൂലമറ്റത്ത് വൈദ്യുതി ഉത്പാദനം ഉയര്‍ത്തി. 4.613 ദശലക്ഷം യൂണിറ്റായിരുന്നു ഇന്നലത്തെ ഉത്പ്പാദനം. കേന്ദ്ര ജലകമ്മിഷന്റെ റൂള്‍കര്‍വ് പ്രകാരം ഓഗസ്റ്റ് 30 ന് ജലനിരപ്പ് 2384.51 അടിയായി ക്രമീകരിക്കണം. അടുത്ത 16 ദിവസത്തിനുള്ളില്‍ 14.01 അടി വെള്ളംകൂടി സംഭരിക്കാം. ഇന്നലത്തെ കണക്കനുസരിച്ച് ജലവിഭവ വകുപ്പിന്റെ നെയ്യാര്‍-68 ശതമാനം, കല്ലട-61, മലങ്കര-72, വാഴാനി-56, ചിമ്മണി-70, പീച്ചി-41, മലമ്പുഴ-59, മംഗലംഡാം-81,പോത്തുണ്ടി-73,മീങ്കര-56,ശിരുവാണി-68 ശതമാനം എന്നിങ്ങനെയാണ് ജലനിരപ്പ്.