റിയാദ്: റിയാദിലുണ്ടായ വാഹനാപകടത്തിൽ മലയാളി മരിച്ചു. തിരുവനന്തപുരം നെയ്യാറ്റിൻ കര വെള്ളറട സ്വദേശി കൊടുവറത്തല വീട്ടിൽ ശശികുമാറാ(53)ണ്‌ റൗദയിൽ വെച്ചുണ്ടായ വാഹനാപകടത്തിൽ മരിച്ചത്. വ്യാഴാഴ്ച വൈകീട്ടാണ്‌ അപകടം നടന്നത്. കർട്ടൻ സാമഗ്രികളുമായി പോകുന്ന വഴിയിൽ വാഹനത്തിൽ നിന്ന് സാധനങ്ങൾ റോഡിൽ തെറിച്ചു വീണത് പിറകെ വന്നിരുന്ന സ്വദേശി പൗരൻ വിളിച്ചു പറഞ്ഞതനുസരിച്ച് പെട്ടെന്ന് വാഹനം നിർത്തി റോഡ് മുറിച്ചു കടക്കുന്നതിനിടയിലാണ്‌ അപകടമുണ്ടായത്. ഉടനെ ആശുപത്രിയിലെത്തിച്ചെങ്കിലും വഴി മധ്യേ മരണം സംഭവിച്ചു.

22 വർഷമായി റിയാദിൽ കർട്ടൻ നിർമ്മാണ തൊഴിലാളിയായി പ്രവർത്തിച്ചിരുന്ന ശശികുമാർ കുടുംബത്തിന്റെ ആശ്രയമായിരുന്നു. ഭാര്യയും രണ്ട് മക്കളുമുണ്ട്. മൃതദേഹം നാട്ടിലെത്തിക്കുന്നതുമായി ബന്ധപ്പെട്ട നടപടികൾ പൂർത്തിയാക്കാൻ കമ്പനിയും സുഹൃത്തുക്കളും രംഗത്തുണ്ട്.