ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ ജീവിതം പ്രമേയമാക്കിയ വെബ് പരമ്പരക്ക് തെരഞ്ഞെടുപ്പ് കമ്മീഷന്‍ വിലക്കേര്‍പ്പെടുത്തി. 'മോദി- എ ജേര്‍ണി ഓഫ് കോമണ്‍മാന്‍' എന്ന പരമ്പരക്കാണ് വിലക്കേര്‍പ്പെടുത്തിയത്. ഈ മാസം മൂന്നിന് ആദ്യ ഭാഗം പുറത്തുവിട്ട പരമ്പര ഇതിനോടകം അഞ്ച് ഭാഗങ്ങള്‍ സംപ്രേഷണം ചെയ്തിരുന്നു. ഇനിയൊരു അറിയിപ്പുണ്ടാകുന്നതുവരെ പരമ്പര സംപ്രേഷണം ചെയ്യരുതെന്നും പരമ്പരയുമായി ബന്ധപ്പെട്ട ഉള്ളടക്കങ്ങളെല്ലാം ഇന്റര്‍നെറ്റില്‍ നിന്നും നീക്കണമെന്നും കമ്മീഷന്‍ ആവശ്യപ്പെട്ടു.

അതേ സമയം നമോ ടിവിക്ക് തിരഞ്ഞെടുപ്പ് കമ്മീഷന്‍ ഇളവു നല്‍കി. വോട്ടെടുപ്പിനു മുന്‍പുള്ള നിശ്ശബ്ദ പ്രചാരണ ഘട്ടത്തില്‍ പ്രധാനമന്ത്രിയുടെ പ്രസംഗം തല്‍സമയം സംപ്രേഷണം ചെയ്യുന്നതില്‍ തടസ്സമില്ല.

എന്നാല്‍ സ്ഥാനാര്‍ഥികളുടെയോ മണ്ഡലങ്ങളുടെയോ പേര് പരാമര്‍ശിക്കരുതെന്ന് കമ്മീഷന്‍ നിര്‍ദേശിച്ചു.