മേപ്പാടി: കഡൂരില്‍ വീണ്ടും പുലി ഇറങ്ങി. പാലാപൊടിയന്‍ റസാഖിന്റെ ആടിനെയാണ് പുലി കൊന്നത്. വീടിന് സമീപത്തെ തേയില തോട്ടത്തില്‍ മേയാന്‍ വിട്ടതായിരുന്നു.
 ആടിനെ കാണാതായതിനെ തുടര്‍ന്ന് നടത്തിയ തിരച്ചിലാണ് പകുതി ഭക്ഷിച്ച നിലയില്‍ ജഡം കണ്ടെത്തിയത്. മാസങ്ങള്‍ക്ക് മുമ്പ് റസാഖിന്റെ തന്നെ രണ്ട് ആടുകളെ പുലി കൊന്നിരുന്നു. പ്രദേശത്തെ മുഹമ്മദ് കുട്ടിയുടെ മൂന്ന് ആടുകളേയും അന്ന് പുലി കൊന്നിരുന്നു.
പുലിയെ പിടികൂടാന്‍ നടപടി വേണമെന്ന് നാട്ടുകാര്‍ ആവശ്യപ്പെട്ടെങ്കിലും കൂടു സ്ഥാപിക്കാന്‍ വനം വകുപ്പ് തയാറായിരുന്നില്ല.
 ഇതാണ് വീണ്ടും പുലി ഇറങ്ങാന്‍ കാരണമെന്ന് നാട്ടുകാര്‍ ആരോപിച്ചു. ഒന്നിലേറെ പുലികള്‍ പ്രദേശത്ത് ഉണ്ടെന്നാണ് നാട്ടുകാര്‍ പറയുന്നത്. അമ്പലക്കുന്ന് പത്താം നമ്പര്‍ ടാങ്ക് കുന്ന് എന്നിവിടങ്ങളില്‍ പകല്‍ സമയത്ത് പോലും പുലിയെ കാണാറുണ്ടെന്ന് നാട്ടുകാര്‍ പറയുന്നു.