ദമാം: സ്‌പോണ്‍സറും മാനേജ്‌മെന്റും തമ്മിലുള്ള നിയമ തര്‍ക്കത്തെ തുടര്‍ന്ന് നാട്ടിലേക്കുള്ള യാത്ര വഴിമുട്ടിയ മലയാളി നഴ്‌സിന് രണ്ടണ്ടു വര്‍ഷത്തിന് ശേഷം എക്‌സിറ്റ് ലഭിച്ചു. ജുബൈല്‍ മെഡിക്കല്‍ സെന്ററിലെ സ്റ്റാഫ് നഴ്‌സ് എറണാകുളം പെരുമ്പാവൂര്‍ സ്വദേശിനി ധന്യാ പടിക്കമലിക്കാണ് ജുബൈല്‍ സാമൂഹിക പ്രവര്‍ത്തകരുടെ പ്രയത്‌നഫലമായി കഴിഞ്ഞ ദിവസം ദമാം ജവാസത്തില്‍ നിന്നു ഫൈനല്‍ എക്‌സിറ്റ് അടിച്ചു കിട്ടിയത്.
സ്വദേശിയുടെ ഉടമസ്ഥാവകാശത്തിലുള്ള സ്ഥാപനം വിദേശികള്‍ക്ക് മുതല്‍മുടക്കാന്‍ സൗകര്യമുള്ള നിയമ സംവിധനത്തിലൂടെയാണ് മലയാളികളായ മാനേജ്‌മെന്റ് വാങ്ങിയത്. എന്നാല്‍, സ്‌പോണ്‍സര്‍ കരാര്‍ ലംഘിച്ചതിനെ തുടര്‍ന്ന് ഇരുകൂട്ടരും തര്‍ക്കമായി. തൊഴിലാളികളുടെ വിസ സ്‌പോണ്‍സറുടെ പേരിലായിരുന്നു. ഒരു വര്‍ഷമായി നാട്ടില്‍ പോകാനുള്ള ശ്രമത്തിലായിരുന്നു ധന്യ. സ്‌പോണ്‍സര്‍ എക്‌സിറ്റ് റീ എന്‍ട്രി അടിച്ചു നല്‍കാത്തതിന്റെ പേരില്‍ ധന്യയുടെ വിസ മാനേജ്‌മെന്റിന്റെ തന്നെ ഉടമസ്ഥതയിലുള്ള മറ്റൊരു ആശുപത്രിയുടെ പേരിലേക്ക് മാറ്റി അവധി അടിച്ചു നല്‍കാനുള്ള ശ്രമം നടത്തി നോക്കിയെങ്കിലും വിജയിച്ചില്ല. ഇതിനിടയില്‍ ഇഖാമയുടെ കാലാവധി തീര്‍ന്നത് പ്രശ്‌നങ്ങള്‍ കൂടുതല്‍ സങ്കീര്‍ണ്ണമാക്കി. ധന്യയുടെ എക്‌സിറ്റ് റി എന്‍ട്രി ശരിയാക്കി കിട്ടാന്‍ ആശുപത്രി നടത്തിപ്പുകാര്‍ സാമൂഹികപ്രവര്‍ത്തകരുടെ സഹായം തേടുകയായിരുന്നു.
സാമൂഹികപ്രവര്‍ത്തകനായ നിജാം വൈക്കത്താണ് ധന്യക്ക് തുണയായത്.