ആലപ്പുഴ: ചേര്‍ത്തലയില്‍ ഗൃഹനാഥനായ ജയരാജന്‍ (58) മരിച്ച സംഭവം കൊലപാതകമാണെന്ന് തെളിഞ്ഞതായി പൊലിസ്. കുടുംബവഴക്കിനിടെ മദ്യലഹരിയിലായിരുന്ന മകന്‍ പിതാവിനെ കഴുത്തുഞെരിച്ച് കൊലപ്പെടുത്തുകയായിരുന്നുവെന്ന്  അന്വേഷണത്തില്‍ വ്യക്തമായതായി പൊലിസ് അറിയിച്ചു. സംഭവത്തില്‍ ജയരാജന്റെ മകന്‍ ഹരികൃഷ്ണനെ (24) പൊലിസ് അറസ്റ്റ് ചെയ്തു. 

ചേര്‍ത്തല നഗരസഭ 23-ാം വാര്‍ഡ് കരുവയില്‍ വെളിയില്‍ വീട്ടില്‍ ഞായറാഴ്ച രാത്രി ഏഴുമണിയോടെയായിരുന്നു നാടിനെ നടുക്കിയ സംഭവം ഉണ്ടായത്. വീട്ടിലുണ്ടായ തര്‍ക്കത്തിനിടെ പിതാവ് കുഴഞ്ഞുവീണു മരിച്ചു എന്നാണ് ഹരികൃഷ്ണനും മറ്റ് കുടുംബാംഗങ്ങളും ആദ്യം നാട്ടുകാരെയും പൊലിസിനെയും ധരിപ്പിച്ചിരുന്നത്. എന്നാല്‍ കുഴഞ്ഞുവീണ ജയരാജനെ  ആശുപത്രിയില്‍ എത്തിക്കാന്‍ വീട്ടിലുണ്ടായിരുന്നവര്‍ തയ്യാറായിരുന്നില്ല എന്നത് സംഭവത്തില്‍ ദുരൂഹതയുളവാക്കി. വീട്ടില്‍ നിന്ന് മാറിത്താമസിക്കുന്ന മൂത്ത മകന്‍ ശ്രീജിത്ത് വീട്ടിലെത്തിയപ്പോഴാണ് ജയരാജനെ ചേര്‍ത്തല താലൂക്ക് ആശുപത്രിയില്‍ എത്തിച്ചത്. മണിക്കൂറുകള്‍ക്ക് ശേഷമായിരുന്നു ഇത്. എന്നാല്‍ അപ്പോഴേക്കും മരണം സംഭവിച്ചിരുന്നു.

ALSO READ: വിഴിഞ്ഞം തുറമുഖം: ഷെയര്‍ കൈമാറാന്‍ സര്‍ക്കാറിന്റെ അനുമതി വേണം, അദാനി ഗ്രൂപ്പ് അനുമതി തേടിയിട്ടില്ലെന്നും മുഖ്യമന്ത്രി

ജയരാജന്റെ ശരീരത്തിന്റെ പല ഭാഗത്തും മുറിവുകളും മര്‍ദനമേറ്റ പാടുകളും കണ്ടപ്പോള്‍ തന്നെ ഡോക്ടര്‍മാര്‍ക്ക് സംശയം തോന്നിയിരുന്നു. തുടര്‍ന്ന് ആശുപത്രി അധികൃതര്‍ ചേര്‍ത്തല പൊലിസിനെ വിവരമറിയിച്ചു. പിന്നീട് നടന്ന പോസ്റ്റ്മോര്‍ട്ടത്തില്‍ ജയരാജന്റെ കഴുത്തില്‍ ബലം പ്രയോഗിച്ചതായുള്ള പാടുകള്‍ കണ്ടെത്തി. കഴുത്തു ഞെരിച്ചതാണ് മരണകാരണമെന്ന് സ്ഥിരീകരിക്കുകയും ചെയ്തു. ഇതോടെ മരണം കൊലപാതകമാണെന്ന് സ്ഥിരീകരിച്ചു.

പോസ്റ്റ്മോര്‍ട്ടം റിപ്പോര്‍ട്ടിലെ വിവരങ്ങളുടെ അടിസ്ഥാനത്തില്‍ പൊലിസ് അന്വേഷണം ഊര്‍ജിതമാക്കുകയും ചെയ്തു. പിന്നീട് സംഭവസമയത്ത് വീട്ടിലുണ്ടായിരുന്ന ഭാര്യയെയും മക്കളെയും വിശദമായി ചോദ്യം ചെയ്തതിലൂടെയാണ് യഥാര്‍ഥ വിവരങ്ങള്‍ പുറത്തുവന്നത്. സ്ഥിരമായി മദ്യപിച്ചെത്തുന്ന ഹരികൃഷ്ണനും പിതാവും തമ്മില്‍ വഴക്ക് പതിവായിരുന്നുവെന്ന് അയല്‍വാസികളും മൊഴിനല്‍കിയിരുന്നു. 

police have arrested a 24-year-old man in cherthala after an investigation revealed that he allegedly strangled his father to death during a family dispute while under the influence of alcohol.