ദുബൈ: സ്വന്തമായി രൂപകല്‍പനചെയ്ത പ്രത്യേക അക്ഷരമാതൃകയായ 'ദുബായ് ഫോണ്ട്' നിലവില്‍ വന്നു. മൈക്രോസോഫ്റ്റാണ് ഫോണ്ടണ്ടിന്റെ രൂപകല്‍പന തയാറാക്കിയിരിക്കുന്നത്.
ദുബൈ കിരീടാവകാശിയും എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാശിദ് അല്‍ മക്തൂമാണ് ഫോണ്ടണ്ട് ദബൈക്കായി സമര്‍പ്പിച്ചത്. ദുബൈ എമിറേറ്റിലെ എല്ലാ സര്‍ക്കാര്‍ സ്ഥാപനങ്ങളിലെയും ഔദ്യോഗിക ആവശ്യങ്ങള്‍ക്ക് ദുബൈ ഫോണ്ട് ഉപയോഗിക്കണമെന്നും അദ്ദേഹം ഉത്തരവിട്ടിട്ടുണ്ട്.
ആദ്യമായാണ് മൈക്രോസോഫ്റ്റ് ഒരു നഗരത്തിന്റെ പേരില്‍ അക്ഷരമാതൃക രൂപകല്‍പന ചെയ്യുന്നത്. 23 ഭാഷകള്‍ക്കായാണ് ഫോണ്ടുകള്‍ പ്രത്യേകം തയ്യാറാക്കിയിട്ടുള്ളത്. മൈക്രോസോഫ്റ്റ് മുഖേന ലോകമെങ്ങുമുള്ള 10 കോടിയോളം ആളുകള്‍ക്ക് ഈ ഫോണ്ടണ്ട് ലഭ്യമാകും.
അന്താരാഷ്ട്ര ഏജന്‍സി മോണോടൈപ്പിന്റെ 'ടൈപ് ഡയറക്ടര്‍' ഡോ. നദീന്‍ ചനൈന്‍ ആണ് രൂപകല്‍പന നിര്‍വഹിച്ചത്. അറബി, ഇംഗ്ലീഷ് അക്ഷരങ്ങള്‍ക്കായി രൂപപ്പെടുത്തിയ മാതൃക, പിന്നീട് മറ്റ് 21 ഭാഷകള്‍ക്കുകൂടി വ്യാപിപ്പിക്കുകയായിരുന്നു. ഉറുദുവും ഇതില്‍ ഇടം നേടിയിട്ടുണ്ട്.