ദോഹ: ലുലു ഹൈപ്പര്‍ മാര്‍ക്കറ്റുകളില്‍ ബ്രിട്ടീഷ് ഭക്ഷ്യമേളക്ക് തുടക്കമായി. അല്‍ മെസ്സിലയിലെ ലുലു ഹൈപ്പര്‍മാര്‍ക്കറ്റില്‍ ബ്രിട്ടീഷ് സ്ഥാനപതി അജയ് ശര്‍മ മേള ഉദ്ഘാടനം ചെയ്തു. ബ്രിട്ടീഷ് എംബസി, ബ്രിട്ടീഷ് കൗണ്‍സില്‍, യുകെ ഇന്റര്‍നാഷനല്‍ ട്രേഡ് വകുപ്പ്, ഖത്തര്‍ ബ്രിട്ടീഷ് ബിസിനസ്സ് ഫോറം, ലുലു ഗ്രൂപ്പ് പ്രതിനിധികള്‍ പങ്കെടുത്തു. ഉദ്ഘാടനത്തോടനുബന്ധിച്ച് നടന്ന കിങ്‌സ് കോളജ് ദോഹയിലെ വിദ്യാര്‍ഥികളുടെ സംഗീതവിരുന്നും ശ്രദ്ധേയമായി.

യുകെയുടെ പാചക പൈതൃകവും രുചിക്കൂട്ടുകളും ഉപഭോക്താക്കളെ പരിചയപ്പെടുത്തുക ലക്ഷ്യമിട്ടാണ് മേള. മീന്‍, ചീസ്, പാലുല്‍പ്പന്നങ്ങള്‍, വ്യത്യസ്ത ഇനം പഴങ്ങള്‍, കാന്‍ഡ് ഫുഡ്, പ്രമേഹ സൗഹൃദ ഉല്‍പ്പന്നങ്ങള്‍, ആരോഗ്യ, ഗാര്‍ഹിക ഉല്‍പ്പന്നങ്ങള്‍ എന്നിവ ഉള്‍പ്പെടെ ബ്രിട്ടനില്‍ നിന്ന് ഇറക്കുമതി ചെയ്യുന്ന പതിനായിരത്തിലധികം ഉല്‍പ്പന്നങ്ങളാണ് മേളയിലുള്ളത്. ഭക്ഷ്യ മേള മെയ് 10ന് സമാപിക്കും.