നെടുമ്പാശ്ശേരി: ഗ്രാമ പഞ്ചായത്തിലെ മുഴുവന്‍ അംഗ പരിമിതര്‍ക്കും സൗജന്യമായി മെഡിക്ലെയിം പദ്ധതി നടപ്പാക്കിക്കൊണ്ട് കുന്നുകര ഗ്രാമപഞ്ചായത്ത് വീണ്ടും ശ്രദ്ധേയമാകുന്നു.
രാജ്യത്ത് തന്നെ ആദ്യമായിട്ടാണ് ഒരു പഞ്ചായത്തിന്റെ നേതൃത്വത്തില്‍ പഞ്ചായത്തിലെ മുഴുവന്‍ വികലാംഗര്‍ക്കും സൗജന്യ ഇന്‍ഷുറന്‍സ് പദ്ധതി നടപ്പാക്കുന്നത്. ന്യൂ ഇന്ത്യ അഷ്വറന്‍സ് കമ്പനിയുമായി സഹകരിച്ച് പ്രൊഫ.കെ.വി.തോമസ് വിദ്യാധനം ട്രസ്റ്റിന്റെ സഹായത്തോടെയാണ് പദ്ധതി വിഭാവനം ചെയ്തിരിക്കുന്നത്. ഇന്ന് വൈകീട്ട് 3 മണിക്ക് കുന്നുകര അഹന ഓഡിറ്റോറിയത്തില്‍ നടക്കുന്ന ചടങ്ങില്‍ കേരള ഗവര്‍ണര്‍ റിട്ട. ചീഫ് ജസ്റ്റീസ് പി.സദാശിവം പദ്ധതി ഉദ്ഘാടനം ചെയ്യും.
ഒരു വര്‍ഷം രണ്ട് ലക്ഷം രൂപ വരെയുള്ള സൗജന്യ ചികിത്സയാണ് ഗുണഭോക്താക്കള്‍ക്ക് ലഭ്യമാകുക. പദ്ധതി പ്രകാരം അംഗപരിമിതരോടൊപ്പം കുടുംബത്തിലെ പരമാവധി നാല് പേര്‍ക്ക് വരെ ഇതിന്റെ പ്രയോജനം ലഭ്യമാകുമെന്ന് ഗ്രാമപഞ്ചായത്ത് പ്രസിഡന്റ് ഫ്രാന്‍സിസ് തറയില്‍ വാര്‍ത്താ സമ്മേളനത്തില്‍ പറഞ്ഞു. ഓരോരുത്തര്‍ക്കും 3570 രൂപയാണ് പ്രീമിയം തുക.ഇതില്‍ 90 ശതമാനം തുകയും ഇന്‍ഷുറന്‍സ് കമ്പനി സബ്‌സിഡിയായി നല്‍കുകയും ബാക്കി തുക ട്രസ്റ്റ് നല്‍കുകയുമാണ് ചെയ്യുന്നത്.
ഉദ്ഘാടന ചടങ്ങില്‍ പ്രൊഫ.കെ.വി.തോമസ് എം.പി.അദ്ധ്യക്ഷനായിരിക്കും. വി.കെ.ഇബ്രാഹിംകുഞ്ഞ് എം.എല്‍.എ, ജില്ലാ കളക്ടര്‍ മുഹമ്മദ് വൈ സഫീറുള്ള, ജില്ലാ പഞ്ചായത്ത് പ്രസിഡന്റ് ആശ സനില്‍ തുടങ്ങിയവര്‍ സംബന്ധിക്കും. വാര്‍ത്താസമ്മേളനത്തില്‍ വൈസ് പ്രസിഡന്റ് സീന സന്തോഷ്, വികസന കാര്യ സ്റ്റാന്റിംഗ് കമ്മിറ്റി ചെയര്‍മാന്‍ സി.യു.ജബ്ബാര്‍ എന്നിവരും പങ്കെടുത്തു.