റിയാദ്: സഊദിയിലെ അൽഖുർമയിലുണ്ടായ വാഹനാപകടത്തിൽ മലപ്പുറം സ്വദേശി മരിച്ചു. നിലമ്പൂർ അമരമ്പലം സ്വദേശി തട്ടാരുപ്പറമ്പിൽ വേണുഗോപാലാണ് (53) മരിച്ചത്.

 

ബുധനാഴ്ച രാവിലെ ഇദ്ദേഹം ഓടിച്ചിരുന്ന ടാങ്കർ ലോറി നിയന്ത്രണം വിട്ട് മറിഞ്ഞാണ് അപകടം. അൽഖുർമയിൽ നിന്ന് 40 കിലോ മീറ്റർ അകലെ ഗരീബിൽ പോയി വെള്ളം നിറച്ച് തിരികെ ഖുറമയിലേക്കുള്ള യാത്ര മധ്യേയാണ് അപകടം. തലക്ക് ഗുരതരമായി പരിക്കേറ്റതിനെ തുടർന്നാണ് മരണം. 23 വർഷമായി അൽഖുർമയിലെ ഒരു കോഴി ഫാമിൽ ഡ്രൈവറായി ജോലി ചെയ്തുവരികയാണ്.

 

അൽഖുർമ ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം നാട്ടിലെത്തിച്ച് സംസ്‌കരിക്കും. നടപടി ക്രമങ്ങൾ പൂർത്തീകരിക്കുന്നതിന് അൽഖുർമ കെ.എം.സി.സി രംഗത്തുണ്ട്. ഭാര്യ: അനിത മോൾ. മക്കൾ; വിഷ്ണു ദാസ്, ജിഷ്ണു.

---