പെരുമ്പാവൂര്‍: ആറ് വയസുകാരനായ മകനെ മര്‍ദിച്ച കേസില്‍ പിതാവ് അറസ്റ്റില്‍. കീഴില്ലം ത്രിവേണി നെല്ലിപ്പറമ്പ് ഭാഗത്ത് മണ്ണാറുകുടി തമ്പിയുടെ വീട്ടില്‍ വാടകയ്ക്ക് താമസിക്കുന്ന തമിഴ്‌നാട് സ്വദേശി (37) യെ കുറുപ്പുംപടി പൊലിസ് അറസ്റ്റ് ചെയ്തു.
ഭാര്യയുമായി പിണങ്ങി കഴിഞ്ഞിരുന്ന പ്രതിയോട് കുട്ടി തന്റെ മാതാവിനെ കാണണമെന്നാവശ്യപ്പെട്ടതിനാണ് കുട്ടിയെ മര്‍ദിച്ചത്.
കഴിഞ്ഞ ദിവസം രാത്രി വീടിന്റെ മുമ്പില്‍ വച്ച് കുട്ടിയെ പ്രതി ക്രൂരമായി വടി കൊണ്ടടിക്കുകയായിരുന്നുവെന്ന് പൊലിസ് പറഞ്ഞു.
കുട്ടിയുടെ ശരീരത്തിലെ പല ഭാഗത്തും പരിക്കേറ്റ പാടുകളുണ്ട്.ശാരീരികമായി കുട്ടിയെ പീഡിപ്പിച്ച പ്രതിക്കെതിരെ ജുവനൈല്‍ ജസ്റ്റിസ് ആക്ട് പ്രകാരം പൊലിസ് കേസെടുത്തു. പ്രതിയെ കോടതിയില്‍ ഹാജരാക്കി.