കോട്ടയം: പരസ്പരം 'വിപ്പ്' നല്‍കി ജോസഫ്- ജോസ് വിഭാഗങ്ങള്‍ രംഗത്തെത്തിയതോടെ കേരള കോണ്‍ഗ്രസി (എം)ല്‍ വിപ്പ് യുദ്ധം മുറുകി. രാജ്യസഭാ തെരഞ്ഞെടുപ്പിലും 24ന് നടക്കുന്ന നിയമസഭയിലെ അവിശ്വാസപ്രമേയ ചര്‍ച്ചയിലും വോട്ടെടുപ്പിലും പങ്കെടുക്കണമെന്ന് ചൂണ്ടിക്കാട്ടി തങ്ങളുടെ എം.എല്‍.എമാര്‍ക്ക് യു.ഡി.എഫ് വിപ്പ് നല്‍കി. ഇതിനുപിന്നാലെയാണ് ജോസഫ്- ജോസ് കെ. മാണി വിഭാഗങ്ങള്‍ പരസ്പരം വിപ്പുമായി രംഗത്തെത്തിയത്.
യു.ഡി.എഫ് വിപ്പിനെതിരേ വിപ്പ് നല്‍കിയാണ് ജോസ് കെ. മാണി വിഭാഗം തിരിച്ചടിച്ചത്. നിയമസഭയില്‍ യു.ഡി.എഫ് കൊണ്ടുവരുന്ന അവിശ്വാസപ്രമേയ ചര്‍ച്ചയില്‍ പങ്കെടുക്കരുതെന്നും വോട്ട് ചെയ്യരുതെന്നും നിര്‍ദേശിച്ചാണ് റോഷി അഗസ്റ്റിന്‍ എം.എല്‍.എ കേരള കോണ്‍ഗ്രസ് (എം) അംഗങ്ങള്‍ക്ക് വിപ്പ് നല്‍കിയത്. അവിശ്വാസ പ്രമേയവുമായി ബന്ധപ്പെട്ട എല്ലാ നടപടികളില്‍ നിന്നും വിട്ടുനില്‍ക്കണമെന്നും നിര്‍ദേശിച്ചിട്ടുണ്ട്. പി.ജെ ജോസഫ് അടക്കം എല്ലാ എം.എല്‍.എമാര്‍ക്കും റോഷി അഗസ്റ്റിന്‍ വിപ്പ് നല്‍കിയിട്ടുണ്ട്. രാജ്യസഭാ തെരഞ്ഞെടുപ്പിലും ഇതേ നിലപാട് തന്നെ സ്വീകരിക്കണമെന്ന് നിര്‍ദേശിച്ചും വിപ്പ് നല്‍കി അവിശ്വാസപ്രമേയം വരുന്ന സാഹചര്യത്തിലാണ് ഈ വിഷയത്തില്‍ പ്രത്യേകം വിപ്പ് നല്‍കിയതെന്ന് ജോസ് കെ. മാണി പക്ഷം വൃക്തമാക്കി. വിപ്പ് ലംഘിക്കുന്നവര്‍ക്കെതിരേ നിയമനടപടി സ്വീകരിക്കുമെന്ന് ജോസ് പക്ഷത്തുള്ള എം.എല്‍.എ എന്‍. ജയരാജ് അറിയിച്ചു. രാജ്യസഭാ തെരഞ്ഞെടുപ്പിലും അവിശ്വാസപ്രമേയ ചര്‍ച്ചയിലും യു.ഡി.എഫിന് അനുകൂലമായ നിലപാട് സ്വീകരിക്കണമെന്ന് നിര്‍ദേശിച്ചാണ് ജോസഫ് വിഭാഗത്തിന് വേണ്ടി മോന്‍സ് ജോസഫ് എം.എല്‍.എ വിപ്പ് നല്‍കിയത്. നിയമസഭാ രേഖകളില്‍ കേരള കോണ്‍ഗ്രസ് (എം) വിപ്പ് റോഷി അഗസ്റ്റിനാണ് എന്നാണ് ജോസ് പക്ഷം അവകാശപ്പെടുന്നത്. എന്നാല്‍, പാര്‍ട്ടി ചെയര്‍മാനായ കെ.എം മാണിയുടെ മരണത്തിനുശേഷം ചേര്‍ന്ന പാര്‍ലമെന്ററി പാര്‍ട്ടി യോഗം നിയമസഭയിലെ കക്ഷിനേതാവായി പി.ജെ ജോസഫിനെയും ഉപനേതാവായി സി.എഫ് തോമസിനെയും സെക്രട്ടറിയും വിപ്പുമായി മോന്‍സ് ജോസഫിനെയും തെരഞ്ഞെടുത്തിരുന്നു. അതിനാല്‍ മോന്‍സ് ജോസഫ് നല്‍കുന്ന വിപ്പും യു.ഡി.എഫ് വിപ്പും അംഗീകരിക്കാന്‍ കേരള കോണ്‍ഗ്രസി (എം)ന്റെ അഞ്ച് എം.എല്‍.എമാരും ബാധ്യസ്ഥരാണെന്ന് ജോസഫ് വിഭാഗം വ്യക്തമാക്കി.