ശ്രീനഗര്‍: അനന്ദ്‌നാഗ് ജില്ലയിലെ കോക്കര്‍നാഗ് മേഖലയില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ ഒരു ഭീകരന്‍ കൊല്ലപ്പെട്ടു. ഏറ്റുമുട്ടല്‍ അവസാനിച്ചതിനെ തുടര്‍ന്ന് പ്രദേശം വളഞ്ഞ് പരിശോധന നടത്തുന്നതായി ജമ്മു കശ്മിര്‍ പൊലിസ് അറിയിച്ചു. മൂന്ന് ഭീകരര്‍ മേഖലയില്‍ എത്തിയിട്ടുണ്ടെന്ന വിവരത്തെ തുടര്‍ന്നാണ് സുരക്ഷാസേന തിരച്ചില്‍ തുടങ്ങിയത്. ഇന്റര്‍നെറ്റ് സര്‍വിസുകളടക്കം റദ്ദ് ചെയ്താണ് സൈന്യം തിരച്ചില്‍ നടത്തിയത്. ഇക്കഴിഞ്ഞ 12ന് ശ്രീനഗറിനടുത്ത ബത്താമലൂവില്‍ ഉണ്ടായ ഏറ്റുമുട്ടലില്‍ ഒരു പൊലിസുകാരന്‍ കൊല്ലപ്പെടുകയും നാലുപേര്‍ക്ക് പരുക്കേല്‍ക്കുകയും ചെയ്തിരുന്നു. ഇതിനുപിന്നാലെയാണ് സംസ്ഥാനത്ത് സുരക്ഷാസേനയുടെ തിരിച്ചടിയില്‍ ഒരു ഭീകരന്‍ കൊല്ലപ്പെട്ട സംഭവമുണ്ടായത്. കഴിഞ്ഞ ഒന്‍പതിനുണ്ടായ ഏറ്റുമുട്ടലില്‍ അഞ്ച് ഭീകരരെയാണ് സൈന്യം കൊലപ്പെടുത്തിയത്. സോപോര്‍ ജില്ലയിലുണ്ടായ ഈ ഏറ്റുമുട്ടലില്‍ കൊല്ലപ്പെട്ട ഭീകരരെല്ലാം ലഷ്‌കറെ ത്വയ്ബ സംഘടനയിലുള്ളവരായിരുന്നു.