ന്യൂയോര്‍ക്ക്: വാക്‌സിന്‍ പരീക്ഷണങ്ങള്‍ പുരോഗമിക്കുന്നതിനിടെ ലോകത്ത് കൊവിഡ് മരണനിരക്ക് കുത്തനെ ഉയരുന്നു. റോയിട്ടേഴ്‌സ് കണക്കു പ്രകാരം ആഗോള കൊവിഡ് മരണം എട്ടു ലക്ഷം കടന്നു. യു.എസ് തന്നെയാണ് മുന്നില്‍. അവിടെ 1,70,000 പേരാണ് ഇതിനകം മഹാമാരിക്കിരയായത്. ജൂലൈയോടെ രോഗവ്യാപനത്തില്‍ കുറവുണ്ടായെങ്കിലും യു.എസില്‍ ഒരാഴ്ച 3,60,000 പേര്‍ക്ക് രോഗം ബാധിക്കുന്നുണ്ട്.
രോഗവ്യാപനത്തിലും മരണത്തിലും രണ്ടാം സ്ഥാനത്തുള്ളത് ബ്രസീലാണ്. അവിടെ 35 ലക്ഷത്തിലേറെ പേര്‍ക്ക് വൈറസ് സ്ഥിരീകരിച്ചു. 1,14,277 പേര്‍ മരിക്കുകയും ചെയ്തു. 30 ലക്ഷത്തിലേറെ പേര്‍ക്ക് രോഗം ബാധിച്ച ഇന്ത്യയില്‍ 56,000 പേര്‍ മരിച്ചിട്ടുണ്ട്. ലോകത്താകെ ഇതിനകം 2.3 കോടി ആളുകള്‍ക്ക് വൈറസ് ബാധിച്ചിട്ടുണ്ട്. ഒന്നര കോടി പേര്‍ രോഗമുക്തരായി.
സ്പാനിഷ് ഫ്‌ളുവിനു ശേഷം ലോകത്തെ വിറപ്പിക്കുന്ന മഹാമാരി മൂലം മണിക്കൂറില്‍ 246 പേരാണ് മരിക്കുന്നത്. 24 മണിക്കൂറില്‍ 5,900 പേര്‍.
സ്‌കൂളുകളും വ്യാപാര സ്ഥാപനങ്ങളും തുറന്ന് രോഗവ്യാപനം തടയുന്നതില്‍ യു.എസും ബ്രസീലൂം അലംഭാവം കാണിക്കുകയാണെന്ന് ആരോഗ്യ വിദഗ്ധര്‍ കുറ്റപ്പെടുത്തുന്നു.
വൈറസ് നിയന്ത്രണവിധേയമായ സ്‌പെയിന്‍, ഇറ്റലി, ജര്‍മനി, ഫ്രാന്‍സ് എന്നിവ രോഗത്തിന്റെ രണ്ടാം വരവ് ഭയക്കുകയാണ്. രണ്ടാം വരവ് തടയാന്‍ നിയന്ത്രണങ്ങള്‍ കടുപ്പിക്കാനൊരുങ്ങുകയാണ് ദക്ഷിണ കൊറിയ.