വെള്ളാങ്ങല്ലൂര്‍: പതിവ് തെറ്റിക്കാതെ ഇക്കുറിയും അബ്ദുല്‍ ജബ്ബാറെത്തി ആദ്യ വോട്ടുകാരനാകാന്‍. കോണത്തുകുന്ന് സെന്ററിനടുത്ത് താമസിക്കുന്ന പെഴുംകാട്ടില്‍ ജബ്ബാറാണ് കോണത്തുകുന്ന് ഗവ.യു.പി സ്‌കൂളിലെ 11-ാം നമ്പര്‍ പോളിങ് സ്റ്റേഷനിലെ ആദ്യത്തെ വോട്ടു ചെയ്യാനെത്തിയത്.
74 കാരനായ അബ്ദുല്‍ ജബ്ബാര്‍ പള്ളിയില്‍നിന്ന് സുബ്ഹി നമസ്‌കാരവും കഴിഞ്ഞ് രാവിലെ ആറിനു തന്നെ പോളിങ് സ്റ്റേഷനിലെത്തി. ഏഴിന് ആദ്യം വോട്ടു ചെയ്തു. ആദ്യകാല കോണ്‍ഗ്രസ് പ്രവര്‍ത്തകനായ അബ്ദുല്‍ ജബ്ബാര്‍ 1967 മുതല്‍ തന്റെ പോളിങ് സ്റ്റേഷനിലെ ആദ്യത്തെ വോട്ട് ചെയ്ത് വരുന്നു.
ആദ്യത്തെ വോട്ട് ചെയ്യണമെന്ന് അദ്ദേഹത്തിന് നിര്‍ബന്ധമാണ്. ഇടക്കാലത്ത് പ്രവാസ ജീവിതകാലത്ത് മാത്രമാണ് വോട്ട് ചെയ്യാന്‍ കഴിയാതിരുന്നത്. 23-ാം വയസില്‍ മണ്ഡലം കോണ്‍ഗ്രസ് വൈസ് പ്രസിഡന്റ് ആയിരുന്ന അബ്ദുല്‍ ജബ്ബാര്‍ ഏതാനും വര്‍ഷങ്ങളായി സജീവ രാഷ്ട്രീയത്തില്‍ നിന്നും വിട്ടു നില്‍ക്കുകയാണ്. എന്നാലും വോട്ട് എന്നും കോണ്‍ഗ്രസിന് തന്നെയാണെന്ന് കെ. കരുണാകരനെ ഏറെ ഇഷ്ടപ്പെടുന്ന അബ്ദുല്‍ ജബ്ബാര്‍ പറഞ്ഞു.
രാഹുല്‍ ഗാന്ധി പ്രധാനമന്ത്രിയാകുന്നത് കാണാന്‍ കാത്തിരിക്കുകയാണെന്ന് പഴയ ആവേശത്തോടെ തന്നെ അബ്ദുല്‍ ജബ്ബാര്‍ പറഞ്ഞു.