തിരുവനന്തപുരം: ഇന്ത്യന്‍ സൂപ്പര്‍ ലീഗ് ഫുട്‌ബോളിന്റെ അഞ്ചാം സീസണ്‍ സെപ്റ്റംബര്‍ 29ന് കൊല്‍ക്കത്തയില്‍ തുടക്കമാവും. ഉദ്ഘാടന പോരാട്ടത്തില്‍ കേരള ബ്ലാസ്‌റ്റേഴ്‌സ് എ.ടി.കെയെ നേരിടും. എ.ടി.കെയുടെ ഗ്രൗണ്ടായ കൊല്‍ക്കത്ത സാള്‍ട്ട് ലേക്കിലെ വിവേകാനന്ദ യുവ ഭാരതി ക്രിരംഗനിലാണ് സ്‌റ്റേഡിയത്തില്‍ വച്ചാണ് മത്സരം.
കഴിഞ്ഞ സീസണിലും ബ്ലാസ്‌റ്റേഴ്‌സും എ.ടി.കെയും തമ്മിലായിരുന്നു ആദ്യ മത്സരം. ആദ്യ ഘട്ട ഫിക്‌സ്ചറില്‍ ഡിസംബര്‍ 16 വരെയുള്ള മത്സരങ്ങളാണ് ഉള്‍പ്പെടുത്തിയിട്ടുള്ളത്. 201 9ല്‍ നടക്കുന്ന മത്സരങ്ങളുടെ ക്രമം പിന്നീട് പ്രഖ്യാപിക്കും. സെപ്റ്റംബര്‍ 30ന് കഴിഞ്ഞ സീസണിലെ ഫൈനലിസ്റ്റുകളായ ബംഗളുരു എഫ്.സിയും നിലവിലെ ജേതാക്കളായ ചെന്നൈയിന്‍ എഫ്.സിയും ഏറ്റുമുട്ടും. ബംഗളുരുവിലെ ശ്രീകണ്ഠീരവ സ്‌റ്റേഡിയത്തിലാണ് പോരാട്ടം. ഒക്ടോബര്‍ അഞ്ചിന് മുംബൈ സിറ്റിക്കെതിരേയാണ് കേരള ബ്ലാസ്‌റ്റേഴ്‌സിന്റെ ആദ്യ ഹോം മത്സരം. കഴിഞ്ഞ സീസണില്‍ നിന്ന് വ്യത്യസ്തമായി ഇത്തവണ എല്ലാ ദിവസവും ഒരു മത്സരം മാത്രമാണുള്ളത്. കഴിഞ്ഞ സീസണില്‍ ശനി, ഞായര്‍ ദിവസങ്ങളില്‍ രണ്ടു മത്സരങ്ങള്‍ വീതം നടത്തിയിരുന്നു. കിക്കോഫ് സമയത്തിലും മാറ്റമുണ്ട്. പുതിയ സീസണില്‍ വൈകിട്ട് 7.30ന് എല്ലാ മത്സരങ്ങളും ആരംഭിക്കും. അന്താരാഷ്ട്ര മത്സരങ്ങള്‍ പരിഗണിച്ച് ഇക്കുറി ഐ.എസ്.എല്‍ സീസണിനിടയില്‍ മൂന്ന് ഇടവേളകളുമുണ്ടാവും. ഒക്ടോബര്‍ എട്ട് മുതല്‍ 16 വരെയും നവംബര്‍ 12 മുതല്‍ 20 വരെയും ഫിഫ അന്താരാഷ്ട്ര മത്സരങ്ങള്‍ നടക്കുന്നതിനാല്‍ ഐ.എസ്.എല്‍ മത്സരങ്ങളുണ്ടാകില്ല. ഡിസംബര്‍ 17 മുതല്‍ ഏഷ്യാ കപ്പിനുള്ള ഇന്ത്യന്‍ ടീമിന്റെ ക്യാംപിനെ തുടര്‍ന്നും ഐ.എസ്.എല്ലിന് ഇടവേളയുണ്ടാകും.