പത്തനാപുരം: എല്‍.ഡി.എഫ് പോളിങ് ബൂത്ത് തകര്‍ത്തവര്‍ക്കെതിരേ അന്വേഷണം നടത്തി കുറ്റവാളികളെ മാതൃകാപരമായി ശിക്ഷിക്കണമെന്ന് എല്‍.ഡി.എഫ് തെരെഞ്ഞെടുപ്പ് മേഖലാ കമ്മിറ്റി ആവശ്യപ്പെട്ടു.
22ന് രാത്രി എല്‍.ഡി.എഫ് പ്രവര്‍ത്തകര്‍ ബൂത്ത് കെട്ടി വീട്ടില്‍ പോയ ശേഷം ചിലര്‍ രാഷ്ട്രിയ ഗൂഢാലോചന നടത്തി ബൂത്ത് പൂര്‍ണമായി അടിച്ചു തകര്‍ത്തെന്നാണ് പരാതി. ഇതിന് സമീപം തന്നെ യു.ഡി.എഫ്, എന്‍.ഡി.എ മുന്നണികളുടെ ബൂത്ത് യാതൊരു കുഴപ്പവും ഇല്ലാതെ നിലനിന്നിരുന്നു.
23ന് രാവിലെ 5.30നാണ് ബൂത്തു തകര്‍ത്ത നിലയില്‍ കണ്ടത്. 23ന് സംഘര്‍ഷം സൃഷ്ടിക്കാനും പോളിങ് തടസപ്പെടുത്താനും ബോധപൂര്‍വം നടത്തിയ രാഷ്ട്രിയ ഗുഢാലോചനയെക്കുറിച്ച് അന്വേഷണം നടത്തി കുറ്റക്കാര്‍ക്കെതിരേ കര്‍ശന നടപടിയെടുക്കണമെന്ന് തെരെഞ്ഞെടുപ്പ് ഉദ്യോഗസ്ഥര്‍ക്കം പൊലിസിനും നല്‍കിയ പരാതിയില്‍ ആവശ്യപ്പെട്ടതായി എല്‍.ഡി.എഫ് നേതാക്കളായ കറവൂര്‍ എല്‍. വര്‍ഗീസ്, കെ. മധു, അനില്‍കുമാര്‍, മനു കുമാര്‍, കെ.ജി വിജയകുമാര്‍ അറിയിച്ചു.