ന്യൂഡല്‍ഹി:ജെ.ഇ.ഇ നീറ്റ് പരീക്ഷകള്‍ നീട്ടിവയ്ക്കില്ലെന്ന സുപ്രിംകോടതി വിധി പുനപരിശോധിക്കണമെന്ന് ഹരജി. പശ്ചിമ ബംഗാള്‍,ജാര്‍ഖണ്ഡ്‌,രാജസ്ഥാന്‍, പഞ്ചാബ്, ചത്തീസ്ഗഢ് സംസ്ഥാനങ്ങളിലെ ആറുമന്ത്രിമാരാണ്  പുനപരിശോധന ഹരജി നല്‍കിയത്.

വിദ്യാര്‍ഥികള്‍ക്കുണ്ടാകുന്ന ആരോഗ്യഭീഷണി കണക്കിലെടുക്കാതെയാണ് സുപ്രിംകോടതി വിധിയെന്ന് ഹരജിയില്‍ പറയുന്നു.പരീക്ഷകള്‍ മാറ്റിവെക്കണമെന്ന് ആവശ്യപ്പെട്ട് 11 സംസ്ഥാനങ്ങളില്‍ നിന്നുള്ള 11 വിദ്യാര്‍ഥികള്‍ നല്‍കിയ ഹരജി സുപ്രീംകോടതി തള്ളിയിരുന്നു. വിദ്യാര്‍ഥികളുടെ ഭാവി അവതാളത്തിലാക്കാനാവില്ലെന്ന് ചൂണ്ടിക്കാട്ടിയായിരുന്നു വിധി. ഇതിനെതിരെയാണ് പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങള്‍ സുപ്രീംകോടതിയില്‍ ഹരജി നല്‍കിയത്.

നേരത്തെ പ്രശ്നം ചര്‍ച്ച ചെയ്യാനായി സോണിയ ഗാന്ധിയുടേയും ബംഗാള്‍ മുഖ്യമന്ത്രി മമത ബാനര്‍ജിയുടേയും നേതൃത്വത്തില്‍ പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങളുടെ യോഗം വിളിച്ചിരുന്നു. ഈ യോഗത്തില്‍ പല മുഖ്യമന്ത്രിമാരും സുപ്രീംകോടതിയില്‍ പുനഃപരിശോധന ഹരജി നല്‍കണമെന്ന് ആവശ്യപ്പെട്ടിരുന്നു.

കൊവിഡ് മൂലം വിദ്യാര്‍ഥികളുടെ ഒരുവര്‍ഷം നഷ്ടമാകുന്നത് അംഗീകരിക്കാനാവില്ലെന്ന് ചൂണ്ടിക്കാട്ടിയാണ് പ്രവേശനപരീക്ഷ നടത്താന്‍ സുപ്രിംകോടതി അനുമതി നല്‍കിയത്.