വടക്കാഞ്ചേരി: കഴിഞ്ഞ രാത്രിയില്‍ പെയ്ത വേനല്‍ മഴയ്ക്കിടെയുണ്ടായ കനത്ത കാറ്റില്‍ വടക്കാഞ്ചേരി നഗരസഭയിലെ മാരാത്തുകുന്ന് മേഖലയില്‍ വന്‍ നാശം.
മരങ്ങള്‍ മറിഞ്ഞു വീണും ശിഖിരങ്ങള്‍ പൊട്ടി വീടുകളുടെ മുകളിലേക്കും വൈദ്യുതി കമ്പിയിലേക്കും വീണ് മേഖലയില്‍ വൈദ്യുതി ബന്ധം താറുമാറായി. മാരാത്തുകുന്ന് ഹര്‍ഷന്‍ സ്മാരക വായനശാല പരിസരത്താണ് നാശനഷ്ടങ്ങള്‍ കൂടുതലും ഉണ്ടായിരിക്കുന്നത്. മങ്കര തൊടി ഖാലിദിന്റെ വീടിനു മുന്നിലേക്ക് ഭീമന്‍ മരം മറിഞ്ഞു വീണ് വീട്ടുകാര്‍ക്ക് വീടിനുള്ളില്‍നിന്ന് പുറത്തിറങ്ങാന്‍ കഴിയാത്ത അവസ്ഥയാണ്. വാഹനങ്ങളും വീടിന്റെ പോര്‍ച്ചില്‍ കുടുങ്ങി. കുന്നത്ത് പീടികയില്‍ മുഹമ്മദിന്റ വീട്ടുപറമ്പിലെ നിരവധി മരങ്ങള്‍ കടപുഴകി. വീടിനോടു ചേര്‍ന്നുള്ള ആട്ടിന്‍ കൂട് തകര്‍ന്നു. ആടുകള്‍ അത്ഭുതകരമായി രക്ഷപ്പെട്ടു. രവിയുടെ വീടിനു മുകളിലേക്കു പ്ലാവിന്റെ ശിഖരം പൊട്ടിവീണു. മതിലിനു മുകളിലേക്കു തെങ്ങ് വീണ് വീടു തകര്‍ന്നു. ഒട്ടേറെ വാഴകളും മറിഞ്ഞു വീണിട്ടുണ്ട്. ജനവാസ മേഖലയെ ആകെ ഭീതിയുടെ മുള്‍മുനയില്‍ നിര്‍ത്തിയാണ് പ്രദേശത്ത് കാറ്റ് ആഞ്ഞുവീശിയത്.