പൂച്ചാക്കല്‍: കഴിഞ്ഞ ദിവസമുണ്ടായ ശക്തമായ കാറ്റിലും മഴയിലും വീടുകള്‍ തകര്‍ന്നു. പാണാവള്ളി പഞ്ചായത്ത് അഞ്ചാം വാര്‍ഡില്‍ മരം വീണ് രണ്ടു വീടുകളാണ് തകര്‍ന്നത്.
വളവില്‍ ഷാജിയുടേയും കടേപ്പറമ്പ് സുന്ദരന്റേയും വീടിന് മുകളിലേക്കാണ് ഇന്നലെ രാത്രി ആഞ്ഞിലി മരങ്ങള്‍ കടപുഴകി വീണത്. സുന്ദരന്റെ വീടിന്റെ മേല്‍ക്കൂര ഒരു ഭാഗം പൂര്‍ണമായും തകര്‍ന്നു. ഷാജിയുടെ വീടിന് മുകളില്‍ മരം വീണ് നിലംപതിച്ച അവസ്ഥയാണ്. അപകട സമയം വീടുകളില്‍ ആളുകളുണ്ടായിരുന്നുവെങ്കിലും ശബ്ദം കേട്ട് പുറത്തേക്ക് ഓടി രക്ഷപ്പെടുകയായിരുന്നു.
വ്യാഴാഴ്ച വൈകുന്നേരമുണ്ടായ ശക്തമായ കാറ്റിലും മഴയിലും തൈക്കാട്ടുശ്ശേരി പഞ്ചായത്ത് ഒന്നാം വാര്‍ഡ് മാണിഭവനത്തില്‍ രവീന്ദ്രന്റെ വീടും ഭാഗികമായി തകര്‍ന്നു.