അഗളി: ഓള്‍ ഇന്ത്യ കരാട്ടെ ഫെഡറേഷന്‍ ജനുവരിയില്‍ ഹരിദ്വാറിലും ഈ മാസം പൂനയിലും സംഘടിപ്പിച്ച ദേശീയ കരാട്ടെ ചാംപ്യന്‍ഷിപ്പില്‍ കേരളത്തിന്റെ യശസ് ഉയര്‍ത്തിയത് അട്ടപ്പാടിയിലെ രണ്ട് വിദ്യാര്‍ഥികള്‍.ആനക്കട്ടി ഗവണ്‍മെന്റ് ഹൈസ്‌കൂളിലെ പത്താംതരം വിദ്യാര്‍ഥിയായ പാര്‍ഥിപനും, അഗളി ജി. വി. എച്ച്. എസ്സിലെ. വിദ്യാര്‍ഥിനിയായ വി. സ്‌നേഹയുമാണ്ആ രണ്ട് പ്രതിഭകള്‍. പൂനയില്‍ നടന്ന മുപ്പതാമത് ദേശിയ ചാംപ്യന്‍ഷിപ്പിലാണ് (എ. ഐ. കെ. എഫ്) ഇരുവരും വെള്ളി മെഡല്‍ നേടിയത്.
നിര്‍ധന കുടുംബത്തില്‍ നിന്ന് വരുന്ന ഇരുവരും പ്രതികൂല സാഹചര്യങ്ങളെ തരണം ചെയ്താണ് ഈ അഭിമാന നേട്ടത്തില്‍ എത്തിചേര്‍ന്നത്. അഗളിയില്‍ ചായക്കട നടത്തുന്ന കുമാറിന്റെ മകനാണ് പാര്‍ഥിപന്‍. കഴിഞ്ഞമാസം അഗളി ഐ. എച്ച്. ആര്‍. ഡി. കോളജിന് മുന്‍പില്‍വച്ച് കഴുത ബൈക്കിലിടിച്ച് പരുക്ക്പറ്റി വിശ്രമിക്കുകയാണ് കുമാര്‍. രോഗ കിടക്കയില്‍ നിന്നാണ് കുമാര്‍ മകന്റെ വിജയ വാര്‍ത്തയറിഞ്ഞത്. പൂനയില്‍ നടന്ന ദേശീയ മത്സരത്തിലേക്ക് പാലക്കാട് ജില്ലയില്‍ നിന്ന് ഇരുവര്‍ക്കുമാണ് സെലക്ഷന്‍ കിട്ടിയിരുന്നത്. ആലപ്പുഴ, കണ്ണൂര്‍, കാസര്‍ഗോഡ് ജില്ലകളില്‍ നിന്നായി തെരഞ്ഞെടുത്ത പത്തോളം പ്രതിഭകള്‍ ചാംപ്യന്‍ഷിപ്പില്‍ മാറ്റുരച്ചിരുന്നു.
സ്‌പോര്‍ട്‌സ് കരാട്ടെ അസോസിയേഷന്‍ സ്റ്റേറ്റ് പ്രസിഡന്റായ ശിഹാന്‍ ജോയ്‌സ് കൊച്ചുമുറിയലാണ് ഇരുവരുടെയും പരിശീലകന്‍. ഏഴ് വര്‍ഷമായി പരിശീനം നടത്തുന്ന പാര്‍ഥിപന്‍ കഴിഞ്ഞ വര്‍ഷം രണ്ട് സ്വര്‍ണമെഡലുകള്‍ നേടിയിരുന്നു. അഗളി ജി. വി. എച്ച്. എസിലെ സ്റ്റുഡന്‍സ് പൊലിസ് കേഡറ്റു കൂടിയായ സ്‌നേഹ രണ്ട് വര്‍ഷത്തോളമായി ജോയ്‌സ് സാറിന്റെ ശിഷ്യത്വം സ്വീകരിച്ചിട്ട്. അട്ടപ്പാടിയില്‍ നിരവധി കരാട്ടെയില്‍ പ്രതിഭകള്‍ ഉണ്ടെങ്കിലും മുളയിലെ വളര്‍ത്തി കൊണ്ടുവരുന്നതില്‍ സ്‌കൂള്‍ അധികൃതര്‍ അമാന്തം കാണിക്കുകയാണ്. നിരവധി ഫണ്ടുകള്‍ ഇതിനായി സര്‍ക്കാര്‍ നല്‍കുന്നണ്ടെങ്കിലും അടിസ്ഥാന സൗകര്യമൊരുക്കുന്നതില്‍ പോലും പിന്നിലാണെന്നും കോച്ച് ജോയ്‌സ് കൊച്ച്മുറിയല്‍ സുപ്രഭാതത്തോട് പറഞ്ഞു.