കോഴിക്കോട്: നിയമം കൈയിലെടുത്ത് അഴിഞ്ഞാടുന്ന ഒരു വിഭാഗം അഭിഭാഷകര്‍ക്കു താക്കീതുമായി കേരള പത്രപ്രവര്‍ത്തക യൂനിയന്‍ ജില്ലാ കമ്മിറ്റിയുടെ ആഭിമുഖ്യത്തില്‍ നഗരത്തില്‍ പ്രതിഷേധ പ്രകടനം നടത്തി. രണ്ടു തവണയായാണു പ്രകടനം നടന്നത്.
കൊച്ചി ഹൈകോടതിയില്‍ മാധ്യമ പ്രവര്‍ത്തകരെ കൈയേറ്റം ചെയ്ത അഭിഭാഷകരുടെ നടപടിയില്‍ പ്രതിഷേധിച്ചു രാവിലെ പ്രകടനം നടന്നു. തിരുവനന്തപുരം വഞ്ചിയൂരില്‍ കോടതി നടപടികള്‍ റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെ ഭീകരമായി മര്‍ദിച്ച നടപടയില്‍ പ്രതിഷേധിച്ചു വൈകിട്ടും പ്രകടനം നടന്നു.
കിഡ്‌സണ്‍ കോര്‍ണറില്‍ നടന്ന പ്രതിഷേധ സംഗമത്തില്‍ അഭിഭാഷകരുടെ കോലം കത്തിച്ചു. പത്രപ്രവര്‍ത്തക യൂനിയന്‍ ജില്ലാ പ്രസിഡന്റ് കമാല്‍ വരദൂര്‍ ഉദ്ഘാടനം ചെയ്തു. നിയമവ്യവസ്ഥയെ മാനിച്ചു സമാധാനപരമായാണു മാധ്യമ പ്രവര്‍ത്തകര്‍ പ്രതിഷേധ പ്രകടനം നടത്തിയത്. എന്നാല്‍, അക്രമമാര്‍ഗങ്ങളിലൂടെ മാധ്യമപ്രവര്‍ത്തകരെ നേരിടാനാണു ശ്രമമെങ്കില്‍ ശക്തമായി പ്രതികരിക്കുമെന്നും അദ്ദേഹം പറഞ്ഞു.
ജില്ലാ സെക്രട്ടറി എന്‍. രാജേഷ്, ട്രഷറര്‍ വിപുല്‍നാഥ്, ജോ. സെക്രട്ടറി കെ.സി റിയാസ്, കെ.യു.ഡബ്ല്യു.ജെ സംസ്ഥാന കമ്മിറ്റി അംഗങ്ങളായ മുഹമ്മദലി, റസല്‍ ഷാഹുല്‍, പി. കുട്ടന്‍, സി.പി.എം സഈദ് അഹമ്മദ്, കെ. ഗോപാലകൃഷ്ണ്‍, പ്രസ് ക്ലബ് ജോ.സെക്രട്ടറി സോഫിയാ ബിന്ദ്, വൈസ് പ്രസിഡന്റ് റഫീഖ് റമദാന്‍, എം.കെ രമേഷ് കുമാര്‍, കെ. മധുസൂദനന്‍ കര്‍ത്ത, കെ. മധു, സി.ആര്‍ രാജേഷ് പ്രസംഗിച്ചു.