പുതുനഗരം: ചുള്ളിയാര്‍ ഡാമില്‍ പിടിക്കുന്ന മത്സ്യം മറിച്ചുവില്‍പന നടത്തുന്നുവെന്നും ചോദ്യം ചെയ്യുന്നവരെ കൈയേറ്റം ചെയ്യുന്നതായും പരാതി. ഫിഷറീസിന്റെ സഹകരണ സൊസൈറ്റിയില്‍ അംഗങ്ങളായവര്‍ ഡാമില്‍നിന്ന് പിടിക്കുന്ന മത്സ്യങ്ങളെ വാങ്ങാനെത്തുന്നവര്‍ക്ക് ടോക്കണ്‍ അനുസരിച്ച് വില്‍പന നടത്തണമെന്ന നിര്‍ദേശമാണ് അട്ടിമറിക്കുന്നത്. മത്സ്യം വാങ്ങാനെത്തുന്നവരില്‍ പകുതിപേര്‍ക്ക് മാത്രം മത്സ്യം നല്‍കുകയും മറ്റുള്ളവ ഹോട്ടലുകള്‍ക്ക് മറിച്ചുവില്‍പന നടത്തുന്നതായുമാണ് ആരോപണം ഉയര്‍ന്നിരിക്കുന്നത്.
കഴിഞ്ഞ ശനിയാഴ്ച രാവിലെ ചുള്ളിയാര്‍ ഡാമില്‍ ഫിഷറീസ് കേന്ദ്രത്തില്‍ മത്സ്യം വാങ്ങാനെത്തിയ 28 പേരില്‍ പകുതി ടോക്കറ്റുകള്‍ക്കു മാത്രമാണ് മത്സ്യം നല്‍കിയത്. 300 കിലോയിലധികം മത്സ്യമുണ്ടായിട്ടും കരിഞ്ചന്തയില്‍ മറിച്ച് വില്‍പന നടത്തുന്നതിനായി മത്സ്യം ഇല്ലെന്ന് പറഞ്ഞ് വാങ്ങാനെത്തിയവരെ പിന്തിരിപ്പിച്ച് വിടുകയായിരുന്നു.
300 കിലോ മത്സ്യം യഥേഷ്ടം വില്‍പ്പന നടത്തേണ്ടതിനു പകരം മറിച്ചുവില്‍പന നടത്തുവാനായി സാധാരണക്കാര്‍ക്ക് നല്‍കാത്തതിനെതിരേ പ്രതിഷേധിച്ചെങ്കിലും ഫലമുണ്ടായില്ലെന്ന് മത്സ്യം വാങ്ങാനെത്തിയവര്‍ പറഞ്ഞു. ഫിഷറീസ് വകുപ്പിന്റെ ഇടപെടല്‍ ഇല്ലാത്തതാണ് പ്രശ്‌നങ്ങള്‍ക്ക് വഴിവക്കുന്നത്. ജലനിരപ്പ് താഴ്ന്ന ചുള്ളിയാര്‍ ഡാമില്‍ മത്സ്യം കൂടുതലായി ലഭിക്കുന്നുണ്ടെങ്കിലും ഇവ നാട്ടുകാര്‍ക്ക് സര്‍ക്കാര്‍ നിശ്ചയിച്ച വിലക്ക് വില്‍പ്പന നടത്താതെ ഉയര്‍ന്ന വിലക്ക് മറിച്ചുവില്‍പന നടത്തുന്നത് വിജിലന്‍സ് അന്വേഷിക്കണമെന്ന് ആവശ്യമുയരുന്നു.